Pynbor ki tnad sorkar ban pyndonkam Aadhaar

Shillong, 29 Lber:
Hadien ba la kut ka jingiatai halor u aadhaar Nombar kaba la long mynta ka sngi ha Khasi National Dorbar Hall ha Mawkhar bad hadien ba ki nongiatai ha ka miej ki la pynkut ia ka jingkren jong ki la ailad ia kiwei pat kiba wan sha katei ka jingialang ba kin buh ki jingkylli jong ki kaba ki sngewkwah ha mynsiem ban tip kham shai shuh shuh shaphang u Aadhaar Nombar.
Ha katei ka kynta ia kren kaba la ailad paidbah ia baroh ban buh jingkylli uwei u rangbah uba la kham noh ka rta u la ieng ban kylli na u Pastor PBM Basaiawmoit ha kaba u la ong ba katba u dang shong jingialang u la ioh kawei ka SMS ha mobile jong u kaba la bthah ia u ba u dei ban leh noh ia u Aadhaar nombar khnang ban yn pyllait noh ia ka tulop bai bam tymmen ne ka pension jong u.
Ha katei ka por u la kylli na u pastor “Ngin leh kumno lada ngim pdiang ruh, ngin shem jingeh bad ngin duh bai bam tymmen, u la ong ba u wan khnang sha katei ka jingialang ruh dei namar ba um pat don Aadhaar bad jin lada u la don un ym wan satia”. Utei u rangbah uba la shongthait na ka kam sorkar u la pynpaw ia ki jingeh ba lada um leh ia u Aadhaar Nombar ruh un duh tulop bad un mad jingeh.
Ha katei ka por u Pasotr PBM Basaiawmoit u la ieng bad u la jubab da kaba ong ba u Aadhaar nombar u dei uba ki briew ki leh tang da ka mon sngewbha jong ki hi , “Lada phim mon ban leh ia u Aadhaar nombar wat leh lada phi ia kynduh jingeh wan ngin leit ban ujor sha ing bishar” ong u Pastor da kaba ong ba lada ka tnad kaba utei u rangbah u trei ka pynbor ia u ban leh ia uta u Aadhaar Nombar ka mut ba kata ka tnad ka la pynkheiñ ia ka hukum jong ka ing bishar, u la khot ia utei u rangbah ba un wan shakhmat ban ia kren ia katei ka kam.
Hynrei utei u rangbah u la ong ba ka jingeh ka long ba lada ym leh un duh ia ka bai bam tymmen jong u hynrei u pastor u la ong ba hato u mon ne em ban leh ia uta u aadhaar nombar bad lada um mon ka mut ba ka tnad kaba u trei mynshuwa ka la pynkheiñ ia ka hukum ka kashari bad u la kyntu ia utei u rangbah ban wan ujor sha u ban leh ia kaba donkam hynrei utei u rangbah u la kynran dien noh.