ïathuh ka JACATAM ha ka Irani ba ioh tulop 3-4 bnai

Shillong, 29 Lber: Ka myntri sorkar pdeng ba peit ia ka Human Resources Development (HRD) ka Smriti Irani ka la takrain ia u Symbud Myntri Rangbah ba peit ia ka tnad pule puthi ka jylla u Dr Roytre C Laloo halor ka jingbym lah bha ka sorkar ban pynbiang ia ki jingdonkam pisa kiba iadei bad ka pule puthi ba la ai da ka sorkar.
Kat kum ka tyllong khubor ba la iohlum, la iathuh ba hynne ka sngi ha ka jingkynduh bad ki heh sorkar jylla, ka Irani ka la takrain ia ka sorkar jylla halor ka  jingpyndonkam ia ka pisa ka bym biang satia kaba la bei da ka sorkar pdeng ia ki skul ha kane ka jylla.
“Ka jingbym lah bha ka sorkar ban pynbiang ia ki Utilisation certificate (UC) ia ki  skhim ba la phah ka sorkar pdeng ka dei kawei kaba ka myntri ka la takrain tyngeh ia kane ka sorkar”, la ong ka khubor.
La iathuh ba ki heh sorkar jylla, kim nud ang hakhmat ka Myntri bad ki la shu kohnguh bad ong, ‘hooid madam’ namar ba ka pule puthi ka dei ka mat jong ka sorkar jylla bad ka sorkar pdeng ka shu bei pisa beit. Katkum ka jingtip, ki heh sorkar Meghalaya kim da lah ban ai jubab kaba biang ha ka myntri ka sorkar India. Ha kawei ka liang ka kynhun jong ki nonghikai skul bym dei sorkar ha kane ka jylla hapoh ka lama ka Joint Action Committee of All Teachers’ Association of Meghalaya (JACATAM) ka la kynduh ia ka myntri HRD ha kaba ka la iathuh ia ki jingeh jong ki nonghikai ha kane ka jylla naduh ka jingioh tulop shisien ha ka lai ne saw bnai nalor ka jingbun ki kyrdan ba ka sorkar ka la phiah kynthup ki deficit pattern, deficit system, adhoc, skul sorkar, skul shimet.
Ha ka dorkhas ba la aiti ha ka Irani, ka JACATAM ka la ong ba ki don haduh 13 hajar ki skul bad ki kolej bad 38 hajar ngut ki nonghikai ha kane ka jylla. “Ki nonghikai ki shem jingeh namar ba ka sorkar kam ju ai tulop thikna bad ka shim por 3-4 bnai ban ioh tulop”, la ong ka JACATAM ha ka Irani.
Katkum ka jingiakren bad ki nongialam ka JACATAM, ka Irani ka la kular ban leh eiei ban pynbha ia ka pule puthi ha kane ka jylla.
“Ka pule puthi ka dei ka mat kaba dei ban leh da ka sorkar jylla hynrei kano kano ka jingdonkam ba ka sorkar jylla ka pan bad phah sha ka sorkar pdeng ban pynbha ia ka pule puthi, ka sorkar kan leh ia kaba donkam”, la kular ka Irani ha ki nongialam ka JACATAM.
Ha kane ka jingiakynduh, ki nongialam ka JACATAM ki la pynsngew ha ka Irani ba kan shim khia ban bthah ia ka sorkar jylla ba kan shimti noh ia ka kam nonghikai (provincialisation) ki skul ha kane ka jylla bad ban ai ia ki jingmyntoi ia ki nonghikai kumba long lem kiwei kum ka baibam tymmen.
“Bunsien ngi hap ban mih sha madan ban dawa ia ki hok jong ngi”, la ong ka JACATAM ha ka Irani.
Ki nonghikai ki la dawa ruh ban buh ia ka Technical, Medical bad Vocational Institute ha kane ka jylla ban plie lad ia ki samla ha kane ka thain ban pyntbit ha ki tnad pule kiba iadei bad kane ka phang.