T.10 lak tam kamai ka KHCF, na ka bai wai dukan ha ka tamasa Mawphlang

Shillong,28 Lber:
Ka Khasi Heritage Conservation Forum (KHCF) kaba peit bad pyniaid ia ka shnong tynrai kaba don ha Mawphlang (Heritage Village) bad kaba peit bad pyniaid ruh ia ka tamasa Mawbynna kaba yn pynlong ha katei ka jaka ka la ioh kamai T.10 lak tyngka tang na ka bai ai wai dukan (Stall) sha ki paidbah.
Khyndiat sngi mynshuwa u EM ka tnad Arts and Culture uba dei ruh u nongialam jong ka KHCF u bah Antonio War, u la ong ba tang hapoh ka iewbah kaba la shna kyrpang ha madan bah kaba don ha katei ka jaka ki don 121 tylli ki dukan bad nalor kata hapoh katei ka iew hi la mih biang sa 80 tylli ki dukan kaba mynta baroh ka jingdon ki dukan tang hapoh ka iewbah ka long haduh 201 tylli. Nalor katei ki don ruh ki dukan kiba la shna ha marjan jong ki ing ki Hima bapher bapher nalor kitei ki 201 tylli.
Utei u EM ka KHADC u la ong ba ka dor ba la ai wai na bynta kawei ka dukan ka long T.5000 tyngka kawei. Haba kheiñ ia ka jingmih pisa tang na ki bai dukan kata tang kiba don hapoh iewbah 201 tylli ka jingmih ka la poi sha ka T.10 lak tam kata T.10,05,000 tyngka.