Shah nguid bsein 4, kiew jingkieng 3, ba jan ngam ka jhadc

Jowai, 23 Lber:
Na ka daw ka kynrum kynram kaba la mih hapdeng ki MDC kiba don ha ka liang synshar halor ka kam pynkhyllem shuki ia u CEM, u ma Thombor, bad kane ka la long pynban kum ka jingialeh kai Ludo ha kaba ki la don ki MDC kiba la shah nguid bsein katba kiwei pat ki ioh ban kiew jingkieng.
Ki Saw ngut ki MDC kiba don sha ka liang u ma MB Rymbai, kiba bat ruh ia ki kam Chairman jong ki Committee bapher bapher ki la shah pynhiar shuki noh katba ki MDC kiba don ha ka liang pyrshah kiba la pyllait im ia u ma Thombor Shiwat na ka jingshah pyn khyllem shuki, ki la ioh ban kiew jingkieng.
U ma Suk Shylla, u ma Bison Iano, u ma Chanky Lyngdoh bad u ma Shkem Suchiang kiba dei ki Chairman Committee hapoh ka jingialam u ma Thombor Shiwat, ki la shah pynhiar shuki noh namar ba ki la kyrshan ia ka kynhun u ma MB Rymbai halor ka jingthmu pynkhyllem shuki ia u CEM. Katba ka kong Violet Lyngdoh, u ma Moonlight Pariat bad u ma Marki Mulieh kiba la kyrshan ia u CEM ki la ioh ban shong syndon ha ki shuki ka liang synshar hapoh ka iing dorbar ha kane ka Budget Session.
Shuh Shuh mynta ka sngi, mar syn wai ka dorbar mang tyngka, u CEM u pynhiar shuki biang sa ia uwei u MDC ba kyrshan ia u ma MB Rymbai. Utei u dei u MDC na Barato, u ma Rio Sten.
Ki MDC kiba don sha ka liang u ma MB Rymbai ki kynthup ruh ia u Dy. CEM, A. Andrew Shullai nalor kiwei kiwei kiba kynthup ia u Chairman bad Dy, Chairman ka JHADC.