Pynrem ia ka jingjia ha Sawmer shiteng

Shillong, 22 Lber:
Ha ka jingialang ba kyrkieh jong ka Executive Committee jong ka Dorbar Shnong SawMer ha ryngkat ka jing iadon lang jong ki dkhot bad ki nongialam ka Sawmer Women Organisation (SWO) ki dkhot bad ki nongialam ka Seng Samla kaba la long ha ka 21 tarik mynta u bnai, da kawei ka jingmut ki larai ban pynrem jur halor ka jing shah leh be-i-jot bad shah pyniap dusmon jong ka samla Shailinia Khar rymba kaba la jia ha ka 17 tarik mynta u bnai ha Sawmer shiteng.
Ki nongialam shnong ba kynthup ia u Rangbah Shnong ban Moris Shabong ryngkat ki nongialam ka SWO ,Seng Samla kila pynrem jur ia katei ka jingjia ka bympatju jia koit ha katei ka shnong, ka kyrwoh khubor ka la ong ba katei ka dei tang ka kam ki riew thrang snam bad ki riew dusmon. Ka jingialang ka la pynrem bad kyntu ruh ia ki bor ka aiñ ba ki dei ban shim khia halor kane ka kam bad ban aid a kaba tyngeh ia kiba kum kitei ki briew khnang ba kan long ka jingmaham ia kiwei pat khnang ba kum kitei ki kam kin ymjia shuh ym tang hapoh shnong Sawmer,hynrei ha ka imlang sahlang jong ka jaitbynriew. Ka kyrwoh khubor ka la phah ruh ki jingsngewlem sha kibahaing hasem jong ka Shailinia ba u Blei trai kynrad un pyntngen ia ka mynsiem jong ki.
Ha kawei pat ka khubor, nalor ki jingpynrem ia katei ka jingjia, kum ka dak ka jingpyrshah ia ka jingthombor ia ki kynthei ka KHNAM Youth Wing ka la pynbna ba kan pynlong da ka jingiadeng lama iong ha ka 24 tarik mynta u bnai. KaKHNAMkan pyndeng lama iong ia baroh ki paidbah kylleng ka nongbah Shillong naduh kiba iaid lynti, kiba ha kali bad kiwei. Ka KHNAM ka la kyntu ia baroh ki nongtrei ophis, ki khynnah skul ,ki nongniah kali ba kin deng lama iong ha katei ka sngi ban pyni ia ka dak ka jingpyrshah ia ki kam thombor ia ki kynthei.