Kloi ka sorkar India, ban iakren bad ki kaikhlaw, ong U Rajnath

Shillong, 21 Lber:
U myntri kam poh iing ka sorkar India, U Rajnath Singh, ula leit ban ia kynduh ia ka kurim jong U PA Sangma, ka Sorodini, ia ki arngut ki khun jongu, U Conrad bad U James K Sangma, ha ka iing bad ka jaka trei kam jongki ha Dhankheti.
Ha katei ka jingleit jongu, kaba ula don 20 minit bad katei ka longiing, U Singh, ula pynpaw ia ka jingsngew burom jongu, halor ka jingdon bynta jong U Sangma, ha ka sain pyrthei jong ka Ri India.
U Rajnath, u iathuh, ba u don ka jing ia dei kaba jan bad U PA Sangma, ha kaba u ong, ba u dei uba don shibun ki paralok, wat la ki don ha la ka jong ka jong ka liang sain pyrthei ruh. U Rajnath, ula leit sha ka iing jong U Sangma, hadien jong ka jingialang, kaba la pynlong ha Assam Rifles mynta ka sngi.
Ha kawei pat ka liang, u myntri kam poh iing ka sorkar India, U Rajnath Singh, ula kren shai ba ka sorkar, ka long ba la kloi ban iakren bad ki seng kaikhlaw jong ka dong shatei lam mihngi, tangba, halor ka nongrim, ba lada ki sangeh noh, na ki kam ialeh pyrshah jongki.
“Ngi kloi ban iakren bad no bad no ruh, tangba lada jia ba ki sangeh noh, na ki kam ialeh pyrshah. Nga khot ia baroh ban sangeh noh, na ki kam ialeh pyrshah” ong u myntri, ha ka jingiakren bad ki nongthoh khubor ha Shillong mynta ka sngi.
Ka jubab jong U Rajnath, ka long halor ka jingkylli, la ka sorkar India, ka long ba la khreh ne em, ban iakren bad ki seng kaikhlaw jong ka dong shatei lam Mihngi. U Rajnath, u pynsngew ruh ia ka jing donkam ban nang pynkhlain ia ki kam pahara khappud, ha kaba ula ong ba yn sa iakren bad ki myntri rangbah jong ka thain shatei lam mihngi, ban khanglad ia ki kam khaii tiar tuh lem bad ka jingrung jingmih beain jong ki briew ha ki thain khappud.
Ki don mynta ar tylli ki seng kiba dang bteng ki kam pyntriem jongki ha ka Jylla bad kawei na kitei ka dei ka HNLC bad kawei pat ka GNLA bad ka HNLC, ka pynpaw ia ka jinglong ba la khreh jongka ban iakren bad ka Sorkar, lada jia ba ka sorkar India, kan buh noh ia u ksiang jong ban iakren ia suk bad katei ka seng.