Ba shah pakhang lynti ki paidbah, ha ki shipai GTC

Shillong, 17 Lber:
Lashai ka sngi, kan don ka dorbar Pyllun jong ka Shnong Mawshbuit, ha ka por 8baje mynstep bad ka daw, ka long na ka bynta ban iakren, halor kane ka jingshah khanglad jong ki paidbah ban iaid lyngba ka khyrdop jong ki shipai Gorkha, kaba la jia hynnin ka sngi.
U Bah Kyntiewbor War, General Secretery ka Shnong Mawshbuit, haba iakren bad u nongthoh khubor, u iathuh ba ha katei ka dorbar, yn don lang U MLA ka Constituency, U bah David Nongrum bad kumjuh ruh U MDC jongki, U Bah Pyniaid Syiem.
Haba la kylli, la kin leit ne em ban iakynduh bad U DC, U bah War, u iathuh ba ia katei ka mat, kin sa iakren ha ka jingialang, ka ban long ha ka Sngi Saitjain. U bah War, u kyntait ba kan don kano kano ka jing ia kynduh bad U DC jong ka East Khasi Hills, lashai ka sngi, namar ba u ong, ba ki kwah, ba kan don shwa ka dorbar Shnong, ha shwa ba kin leit iakren bad ka Sorkar.
Ha kawei pat ka khubor, ka myntri kam pohiing ka jylla ka Kong Roshan Warjri ka la ong ba ki paidbah ka shnong Mawshbuit ki la pyrshah ia ka jingpang number jong ki shipai ka GTC ia ki kali kiba dei ban iaid na ka khyrdop shipai bad ban nym shah ia kiwei ki kali ki bym don number ha ka list jong ki shipai.
Haba wanrah ia ka jingthoh halor kane mynta ka sngi ha iing dorbar ba la wanrah da u nongialam liangpyrshah u Dr Donkupar Roy ha ka zero hour notice, ka Kong Roshan ka la ong ba hynnin ka sngi ki shipai ka GTC ki la leh ia kane namar ba hadien ba la mih ka jingjia ha Pathankot ha kaba ka ktem shipai Air Force ka la shah hiar thma ha ki lehnoh na Pakistan.
“Kum ka jingpyrkhing ia ka jingshngain, ki bor shipai ki la leh ia kane da kaba bthah ia ka bor shnong Mawshbuit ban ai ia ki number kali kiba dei ban iaid lyngba katei ka khyrdop hynrei na ka liang ki paidbah ki la pyrshah jur bad ka la mih ka jingiania bad na ka liang ka sorkar ka la bthah ia ka bor synshar district ban mareh bran bran sha katei ka jaka ban iapynbeit ia kane ka kam”, la ong ka Kong Roshan.
“Ka jingialang hapdeng ki bor synshar district, ki bor shipai bad ka bor shnong Mawshbuit kan long lashai ka sngi ban iapynbeit ia kane ka kam”, la pyntip ka myntri kam pohiing.