Sniew lut ki transformer ha Mawlai

Shillong, 17 Lber:
Haba kyrshan ïa ka mat ba la wanrah da u MLA ka Shella mynta ka sngi, ha iing dorbar halor ka bording, u MLA ka UDP na Mawlai Constituency u Bah Embhahlang Syiemlieh ula ong ba ha Mawiong, Nongkwar, Kynton Massar bad Mawtawar ki Transformer ki la sniew mynta la kumba 3 haduh 4 snem balei ka MeECL kam lah ban shim khia halor kane.
U la ong ba ka sorkar ka dei ban pynthi kna ba kine ki shnong kiba la iakynduh jingeh ki dei ban ioh biang ia ka ding kloi.
“Balei ka MeECL kam shym la lah ban pynbha ia kine ki transformer kiba la sniew haba ia ka bill thang ding ki paidbah ki siew beit”, la ong u MLA ka Mawlai.
Katba u MLA ka HSPDP na 34-Mawshynrut Constituency u Bah Witting Mawsor ula ong ba ki paidbah ki la ujor ba kim ïoh tikna ïa ka bording naba ha ka shi sngi ka bording ka neh tang 2 haduh 3 kynta katba ka bai bording pat ha ka shibnai ka heh bha. “Ka bording tikna hynrei ka bai bording pat ka tikna bha ka jingsniew ki Transformer ka jur bha katba ka jingmaramot pat kam tikna, kumta la donkam ban ai jinghikai (Awareness) wat ïa ka tnat MeECL,” ong u Bah Mawsor.
Na ka liang jong u MLA ka HSPDP na Rambrai-Jyrngam u Bah K P Pangniang ula ïathuh ruh ba ha Constituency jong u ki don ki shnong kiba hap ha Mawshynrut C&RD Block ki paidbah ki sah ha ka umdum khlem bording.
Halor kine baroh haba jubab ïa kane u Myntri ka tnat bording u Clement Marak ula pynpaw ba na ka liang ka tnat kan sa peitbniah halor kine ki jingpynpaw jong ki dkhot ka ïing khnang ban lah pynbeit ïa ki jingduna da kaba kyrpad ruh ïa ki paidbah ba kin siew tikna ïa ka bai bording.