Leit jurip U DC, ia ka kshaid Krangshuri

Jowai, 16 Lber:
U Deputy Commissioner ka West Jaintia Hills u la leit ban jurip ia ka Kshaid Krangshuri bad ruh ia ka jingkieng maw kaba naduh ki por u Syiem Jaintia kaba don ha Amlarem, Amlarem Sub-division ha ka jaka kaba la tip kum ka Umiaknieh lane ka Amchakniah ha ka ktien War Jaintia.
U Deputy Commissioner, u Arum Kr Kembhavi ha ryngkat ka SDO bad BDO Amlarem lem bad ki dkhot ka Raid Buam ki la hiar ban jurip ia katei ka jaka kaba khring ia ki nongwan jngoh kai pyrthei.
Ka jingleit jurip u DC sha katei ka jingkieng maw ka long hadien ba u la ioh ia ka jingujor ba ia ki shap ba la ohshrong ha ki maw ba latei ia katei ka jingkieng maw la airong bad kane ka jing airong ka la pynsniew dur ia katei ka jing ohshrong namar ka jingitynnad ka long tang lada lah ban pynneh katkum ba kitei ki jingohshrong ki long naduh hyndai hynthai.
Ia katei ka jingairong la leh da ka Raid Buam Environmental Protection Association ha ka jingthmu ban pynitynnad ia kitei ki jingohshrong, hynrei ka long pynban ka jingpyrshah na kiba bun ki liang kynthup na
kito ki riew wad bniah bad kiba pule ia ka subject History.
Na kaliang u DC u la hukum ka katei ka seng badei peit ia ka mariang ha katei ka jaka ba kan pynkhuid noh ia katei ka rong ba la ai khnang ba ka jingitynnad kan long kumba dei ban long naduh ki por hyndai hynthai.