Pynursla & Mawshynrut, ki Civil Sub Division, Mawlai bad Bhoirymbong kum ki Block

Shillong, 15 Lber:
U Myntri Rang bah ka jylla u Mukul Sangma u la ong ba ka sorkar jylla kan thaw sa saw tylli ki Civil Sub-Division ha kane ka snem mang tyngka 2016-17 bad kine ki saw tylli ki Civil Sub Division ka Pynursla ha East Khasi Hills bad ka Mawshynrut ha West Khasi Hills katba ka Chokpot ha South Garo Hills bad ka Raksamgre ha West Garo Hills.
Ha ka jingkren maitphang halor ka mang tyngka jong u snem 2016-17 hynnin ka sngi, u Mukul Sangma u la ong ba khnang ban pynurlong ia ka jingangnud jong ki paidbah, ka sorkar kan thaw shuh shuh ia ki sub-division bad ki Block.
Ka sorkar ka la thaw ruh saw tylli ki C&RD Block kynthup ka Mawlai kaban pyniakhlad noh na ka Mylliem ha East Khasi Hills, ka Bhoirymbong ban pyniakhlad noh na ka Umsning ha Ri-bhoi District, bad ka Demdema Block ba pyniakhlad noh na ka Selsella ha West Garo Hills bad ka Reapara ban pyniakhlad noh na ka Betasing C &RD Block ha South West Garo Hills.
Nalor kine, ka la pynbna ruh ban thaw ia ar tylli ki Administrative Unit ia ka Ranikor ha South West Khasi Hills bad ka Rongjeng ha East Garo Hills.
Kane ka dei ka sien kaba ar ka sienjam kaba khraw kaba u Myntri Rangbah u Mukul Sangma u la leh hadien ba u la thaw kham mynshwa saw tylli ki district ha ka jylla.
“Ban wanrah ia ka roi ka par kaba sted bad kaba kham paka, bad ban pynduh jait ia ka jingduk ha ka imlang sahlang, ka sorkar ka la shim ia kane ka sienjam ban thaw shuh ia ki Civil sub-division, ki Block bad administrative unit, la ong u Mukul.
Nalor kine, u Myntri Rangbah u la pynbna ruh ban thaw bad pynkiew kyrdan ruh 15 tylli ki Police station ha ka jylla. Kine ki long ka Diengpasoh Police Station ha East Khasi Hills, Umsohlait ha Ri-Bhoi district, Nonghyllam ha South West Garo Hills, Mawshynrut ha West Khasi Hills, Lumshnong ha East Jaintia Hills, Nartiang ha West Jaintia Hills, Damal Asim ha West Garo Hills, Hallidayganj ha West Garo Hills, Salmanpara ha South West Garo Hills, Damalgre ha South west Garo Hills, Gasuapara ha South Garo Hills, Siju ha South Garo Hills, Silkigre ha South Garo Hills, Sangkhinigre ha South Garo Hills bad ka Chiading ha East Garo Hills district.
Ia kine baroh ki Police station yn thaw noh mynta u snem 2016-17, la ong u Myntri Rangbah ka jylla.Katba ia ki lai tylli ki Police Outpost la pynkiew sha ka kyrdan Police Station kynthup ka Mawngap Police Outpost ha East Khasi Hills, ka Jengal Outpost ha West Garo Hills, bad ka Kharkuta Outpost ha North Garo Hills.