Tynruh ki sengbhalang na KHADC ban sangeh knieh jaka ka sorkar

Shillong, 17 Jylliew:
Ki sengbhalang ha kane ka sngi Nyngkong ki la leit tynruh na ka Khasi Hills Autonomous District Council (KHADC) ban shim ia ka rai ban dawa na ka sorkar jylla ba ka dei ban sangeh shi syndon ban knieh ia ki jaka paidbah na ka bynta ban shna ia ka sor Shillong thymmai.
Ki sengbhalang kyn thup ka CSWO, TUR, KSU, HNYF, KWADA, FKJGP ryngkat ki paidbah jong kumba 20 shnong ka katei ka thain ki la ki la dawa na ka sorkar ba ka dei ban sangeh ban knieh ia ki jaka jong ki paidbah kaban long haduh 2000 akar kiba dei ki ri raid tang ka bynta ban shna ia ka sor Shillong Thymmai.
“Ka jiingshim ia ki jaka paidbah dei ban sangeh shi syndon namar ba ka sorkar ka dei tang ka ajen ban shim jaka ba dei jong ka Raid ban die pat sha ki kompeni bad ki kynhun shimet bad kane ka long ka jingpynkhein ia ka Meghalaya Land Transfer Regulation Act 1971,” la ong ki sengbhalang.
Ki seng bhalang ki la dawa ba ka KHADC ka dei ban tuklar ia kane ka kam kumba la bynshet ha ka Sixth Schedule jong ka riti synshar ka ri India ban iada ia ka khyndew ka shyiap jong ki trai jaka trai shnong.