Sdang ka khanasamari, ia ka ioh ka kot na iing u Lat

Shillong, 17 Jylliew:
Ka khanasumari na ka bynta ka ioh ka kot jong ki briew ha ka jylla la sdang mynta ka ka sngi na iing u Lat ka jylla.
Ia kane ka jingthoh khanasamari la pynlong da ka tnad jong ka Economics & Statistics na ing u Lat RS Mooshahary bad ka dei ka sien kaba hynriew.
Hapoh ka jingialam u director ka Economic Census u Bah Arnel Marbaniang la batai ka jinglong bad ka jingmut jong kane ka khanasumari na ka bynta ka jingdonkam ia ka sorkar ba kan thaw ia ki plan na ka bynta ka ioh ka kot jong ki paidbah ka jylla.
Katkum ka Collection of Statistics Act 2008, ka tnad Economics and Statistics ka jylla, ryngkat ka jingiatreilang bad ka Central Statistics Office, ka sorkar pdeng ka la pynlong ia ka VI Economic Census ha Meghalaya ha u bnai Jylliew haduh Naitung 2013.
Kane ka khanasumari, ka long kaba donkam bad la leh ha baroh ki jylla jong ka ri ha kaba la leit rung ha man ki iing ki briew ban shim jingkhein ia ka jinglong ka ioh ka kot bad ruh ha ki bym dei ki iing sah briew ruh.
Haduh mynta, 5 tylli ki jingthoh khasumari la pynlong haduh u snem 1977, 1980, 1990 bad 2005.