Shen ka sorkar kan sa pynbna ia ka elekshon MDC, ong U Bah HDR

Shillong, 10 Lber: U Myntri ka tnad District Council Affairs (DCA) u Bah HDR Lyngdoh u la ong ba ka sorkar jylla kan sa pynbna noh shen ia ka elekshon MDC shiteng samoi ha ki konstitwensi ba sah thylli hadien ba la iehnoh ki 7 ngut ki MDC.
“Ka sorkar shen kan pynbna noh ia ka sngi thep thep ia ka elekshon MDC shiteng samoi ha KHADC bad ha JHADC”, la ong u Bah HDR Lyngdoh haba jubab ia ka jingkylli ba la wanrah da u Nongialam liangpyrshah u Dr Donkupar Roy hapoh ka iing dorbar thawain mynta ka sngi.
“Ka jingpynlong ia ka elekshon shiteng samoi sha ka KHADC bad JHADC ka dang iaid ha ka jingpynkhreh ka sorkar bad yn sa pyn[bteng sla 7] bna shen”, la bynrap u myntri.
Ka jingpynlong ia ka elekshon MDC shiteng samoi ka long kaba donkam hadien ba 7 ngut ki MDC ba bat lang kum ki MLA, kynthup 6 ngut na KHADC bad uwei na JHADC ki la iehnoh, hadien ba ka sorkar jylla ka la pdiang ia ka Ain Khang Bat Ar Kam ka Prevention of Disqualification (Members of Legislative Assembly, Meghalaya) (Amendment) Act, 2015 mynshem snem.
Kine ki ba lait thylli ki long ka Laban ba iehnoh u Bah Sanbor Shullai (NCP), Sohiong jongu Bah HDR Lyngdoh (Congress), Mairang Bah Metbah Lyngdoh (UDP), Mawthadraishan Bah H Brolding Nongsiej (UDP), Nongkrem Bah Ardent M Basaiawmoit (HSPDP), bad na Rambrai-Jyrngam bah K Plasting Pangiang (HSPDP) na KHADC bad u Bah Stephanson Mukhim (Ind) na Amlarem ka JHADC.