Khlem thmu pynkylla Engineering College ia ka Polytechnic:RC Laloo

Shillong, 09 Lber:
U Symbud Myn tri Rangbah ka jylla ba peit ia ka tnad pule puthi, u Dr RC Laloo u la ong ba ka sorkar kam don satia ka jingthmu ban pynkiew kyrdan ia ka Shillong Poly technic sha ka Shillong Engineering College hynrei ka don ka jingthmu ban pynkhlain ia ka ha kiba bun ki jingdonkam.
Kane ka jingjubab u Dr Laloo ka long hapoh ka iing dorbar thawain mynta ka sngi, halor ka jingkylli ba la wanrah da u nongialam liangpyrshah u Dr Donkupar Roy uba kwah ban tip la ka long kaba shisha ne em ba ka sorkar ka don jingthmu ban kyntiew kyrdan ia ka Shillong Polytechnic sha ka Engineering College kaba pura.
“Em, ka sorkar kam don satia ka jingthmu ban pynkiew kyrdan ia ka Shillong Polytechnic sha ka Shillong Engineering College”, la ong u Dr Laloo.
U la iathuh ba ka sorkar ka la don ka jing pynkhreh ban seng ia ka Engineering College la ka jong tangba yn buh ha jaka ba don katei ka Polytechnic bad ka pisa kaba T. 26 klur la don bad ka sorkar mynta ka dang ap ia ka jingmynjur ban ioh na ka tnad AICTE kaba dei ka bor ban peit ia kane ka kam.
U Dr Laloo u la ong ba ka sorkar ka la thaw ia ka komiti ba khlieh da u director ka DHTE ban pule bniah ia ki jingdon kam bad ki bynta jong kane ka Engineering College, ha kaba ka Rashtriya Uchchatar Shiksha Abhiyan (RUSA) ka  la pdiang ia ka jingtyrwa ka sorkar ia kane ha ka 2 tarik Rymphang, 2016. Ka RUSA ka dei ka skhim ka sorkar pdeng kaba ai jingkyrshan ia ki jaka pule ba shalor ka sorkar.
Shwa ia kane, u Nongialam liangpyrshah, u Dr Donkupar Roy u la ong ba dang shen ha ka por ba rakhe dap san phew snem ka Shillong Polytechnic, u Myntri Rangbah u Dr Mukul u la pynbna paidbah ha ka jingkren jongu, ba ka sorkar kan sdang noh ia ka jingpule engineer ha katei ka Polytechnic kaban pynkuew kyrdan sha ka Engineering College hynrei ka jingjubab jong u Dr Laloo ka la long da kumwei pat.
Kumjuh u MLA ka Mawlai u Bah Embhahlang Syiemlieh u la ong ba u Myntri Rangbah u la kren ha katei ka sngi ka 10 tarik Kyllalyngkot, 2016 ban pynkiew kyrdan sha ka Engineering College.
Halor kane, u Myntri Rangbah u Mukul Sangma u la ong ba u la kyntait ba la ong ban pynkiew kyrdan hynrei u la ong ba ka jingkren ka long ba ka sorkar kan pynkhlain ia kane ka jaka pule, hynrei ym ban pynkiew kyrdan.