Ka jingshim khajna ka NHAI ka long beain, ong ka seng ki trai trok

Shillong, 08 Lber:
Ka seng ki trai trok ka Meghalaya Commercial Truck Owners and Operators Association (MCTOOA) ka la ong ba ka jingshim khajna ka kompeni ba shna ia ka surok Naitonal Highway Authoirty of India (NHAI), ha 20Mer ka Ri-Bhoi ka long beain namar ba kane ka surok ym pat dep satia ban shna.
U President ka MCTOOA u Bah Augustine Shanpru u la ong ka surok Fourlane naduh ba sdang haduh ba kut ka shnong Umsning kam dei ka surok Fourlane bad don ruh ki jaka ba twa khyn dew ba la sniew kane ka surok.
“Ka Supreme Court jong u justice T.S Thakur ka long ha ka hukum jongka, ba ym dei ban siew khajna ia ka surok kaba sniew bad lada ka surok ka sniew, ka NHAI ka dei ban oh tang 20 percent na ka dor kaba la buh, bad dei ban siew noh ia kaba la dep siew haduh ba ka surok la pynbha biang bad dei ban ai syrnod ba la pyndep sha ka sorkar India”, la shim u Bah Shanpru na ka hukum ka Suprem Court ha ka jingpynlait khubor mynta ka sngi.
Ka NHAI ka dei ban sangeh mardor ban shim khajna thik kumba la buh namar ba ka dei ka jingpynkhein iaka hukum ka Supreme Court namar ba kam pat lah ban pyndep ia ka jingshna ia ka surok. Ka jingleh ka NHAI ban shim khajna khlem pat pyndep ia ka jingshna ia ka surok, ka long beain haduh katta bad ka sorkar jylla ka dei ban peit ia kane ka jingleh beain ka NHAI, la ong u Bah Shanpru.
U President ka MCTOOA u la ong ba ka long kaba sngew lyngngoh ba ki sengbhalang ki sngap halor kane ka mat. Ki nongtrei ha kitei ki khyrdop khrong khajna ka NHAI baroh dei ki bar jylla suda, bad ka NHAI ruh ka dei ka bar jylla kaba wan leh ia ki kam khaii ha kane ka jylla khlem ka Trading License.
“Ka KHADC ka dei ban khang noh ia kine ki khyrdop khajna ka NHAI namar ba ka la treikama beain khlem ka trading license bad ka tnad bylla ruh ka dei ban shim khia ia kane ka kam”, la bynrap u Bah Shanpru.