Pynbiang kot sla ki nongshongwai ha Lad Sutnga

Jowai, 8 Lber:
Hadien ka jingjia shah pyniap jong ki arngut ki khynnah kynthei ha kine ki khyndiat sngi ba la dep hapoh ka Dong Ladsutnga da u Emvyris Dkhar ia uba la khot sin u Michel Dkhar, na ka liang ka Dorbar Dong Lad sutnga ha ka jingialang paidbah jong ka kaba la long ha kane ka 5 tarik mynta u bnai, khnang ban rat diengkhong ia kino kino ki kam sniew hapoh ka Dong, ka la dawa tyngeh ia baroh ki nong wan shongwai ba ki dei ban pynbiang ia ki kot ki sla, kata kum ka Election Photo Identity Card (EPIC), ka Residential Certificate na u Rangbah shnong jong ki, ka Police Verification na ka bynta ki Bar Jylla lane ka Panchayat na ka shnong ba ki shong.
Ka jingdawa jong ka Dorbar Dong ba kin pynbiang ia ki kot ki sla ka long ba ka Dorbar Dong kan tip shai nangno ki wan bad ki long ki briew kiba kumno la ki long kiba bha ne kiba la shah kyntait shnong, ong ka kyrwoh kaba la phah da u  Rangbah Dong ka Dong Ladsutnga ma S. Sukhlain, East Jaintia Hills District.