U PA Sangma u la batai ia nga ia ka sain pyrthei:Mukul

Shillong, 07 Lber:
U Myntri Rang bah ka jylla u Mukul Sangma u la ong ba u Purno A Sangma u dei uwei na ki nongialam ba la batai bad pynsngew thuh ia u ha ka sain pyrthei. Ia kane u Mukul u la kren ha ka jingialang pyndonburom khadduh ia u Purno A Sangma ha madan Dikki Bandi stadium ha Tura mynta ka sngi hakhmat ki hajar ngut ki paidbah ba la wan kynmaw ieid ia une u riewkhraw ka jaitbynriew Garo.
“Ka sur jong une u rangbah ka la jah hynrei ki kam jongu kin iai kynmaw junom. U dei u nongai mynsiem ia ki samla ha ka sain pyrthei. U la hikai ia ngi ia ki raieh raidam ha ka sain pyrthei”, la ong u Mukul.
U la ong ba u PA Sangma u dei uwei u atiar ba pynpaw nam ia ka thain shatei lam mihngi ka India bad ka pyrthei India bad ka pyrtheid. “U la batai ia nga ha ka sain pyrthei. Ngin iai duh ia u bad ki kam jongu, kin iai ai mynsiem ia ngi”, la ong u Myntri Rangbah.
Katba u MP ka Lok Sabha uba dei ruh u Myntri Rangbah barim ka Nagaland, u Neiphiu Rio uba kren ha jaka jong ka Northeast MPs Forum u la ong, “U la iale ia ka jingkut jingmut jongu haduh ka sngi ba khadduh. U dei ka jingsarong ia ka thain shatei lammihngi ka India bad ki riewlum jong ka ri. Ki kam jongu kin iai sah bad ngi ha ki por baroh”, la ong u Rio.
Katba u Myntri Rangbah barim ka Manipur u Radhabinod Koijam u la batai ia ki rukom pyrkhat jong u Purno A Sangma kum kiba ai jingmut bad kiba iaid shaphrang.
U myntri sorkar pdeng barim u Arvind Kumar u sngew ba u Purno A Sangma u dei ban kha biang ha Tura bad trei ia ka Garo hills bad ka ri, katba u Koijam u sngew ba u Sangma u dei ban kha ha pyrthei India, khnang ba un kham ioh lad khambun ha kane ka ri ba khraw.
U MP ka Shillong ha Lok Sabha u Bah Vincent Pala u la ong ba u PA Sangma kum u riew sain pyrthei ba kynsai. “Ki jingsngew khia jongu ia ka thain shatei lammihngi ka India yn iai kynmaw bad baroh ki MP na kane ka thain kin ieng ha ka nongmuna ba la maitphang une u nongialam”, la ong u Bah Pala.
Katba u nongialam liangpyrshah u Dr Donkupar Roy u sngew ba dei ban don ba mih pateng na ka longiing jong u PA Sangma ban pyndep ia ki kam ba dang sah jong une u nongialam.