Kyllon iap u snar ka GNLA, ha ka jingiather kuli ha Rongtok

Nongstoin, 02 Lber:
Ki heh pulit ka Shallang ha ryngkat ka kynhun SWAT hynnin ka miet kila pynlong ia ka jingkhynra lehnoh kaba jur bha ha kawei na ki jaka ap khyrdop ha Rongtok ka jaka kaba don kham sharum na ka shnong Shallang WKHD.
Na ka liang jong ki pulit ki dang iai bteng ia katei ka jingkhynra haduh mynta ka step bad katba ki pulit ki dang iai bteng ia katei ka jingkhynra ha kapor 7 baje mynstep kala don ka jingiather kuli kaba jur bha hapdeng ki kynhun kaikhlaw ka GNLA bad ki Pulit SWAT ha katei ka jaka.
Ha katei ka jingiather kuli u wei u snar ka kynhun GNLA u la kyllon iap noh ha ki kuli jong ki pulit katba kiwei pat kila lait phet noh da ka said na katei ka jaka, katba na ka liang jong ki kynhun pulit ym shymla don u wei ruh u ba mynsaw ha katei ka jingiather kuli.
Shuh shuh ki pulit hadien katei ka jingiasiat kila ioh ruh ban kurup ia ki tiar ialeh jong kitei ki kaikhlaw kham pajih na katei hi ka jaka kiba kynthup ia kawei ka suloi AK47, 2 tylli ki rds ki bym pat bthei kawei ka pistol ha ryngkat kawei ka rds bad kawei ka id card kaba la don ha ka kyrteng jong ka GNLA.
Katei ka jingkhynra lehnoh jong ki pulit ka long kaba jop bad kin nang iai bteng ruh ban pynlong ia ki jingkhynra bad thwet ia kitei kiba la lait phet khnang ban pynthikna ia ka shong suk shong sain jong ki paidbah ka thain.