Wer lang ka SNSBH ia ki seng kynthei, sha ka jingialang 5 tarik

Shillong, 02 Lber:
Ka Synjuk Ki Nongsynshar Shnong ka Bri U Hynniewtrep (SNSBH) ka pynkynmaw ba ka jingialang bah jong ka, kan long ha ka 5 tarik Lber, 2016 ha Jaiaw Shyiap Lum Pyllon Community Hall por 11 baje mynstep. Ha kane ka jingialang, ka SNSBH ka la iawer ruh ia ki nong ialam jong ki seng kynthei ban iawan lang sha kane ka jingialang nalor ki nongkitkam shnong.
Kane ka jingialang kan iakren na ka jingmih na ka jingiakren bad u Myntri Rangbah ha ka 10 tarik Rymphang 2016.
Ha ka jingpynlait khubor, u generl secretary ka NSBH u Bah RL Blah u la ong ba ka Executive Committee ka la rai ban khot da ka jingialang bah ha ka 05 tarik ban ia phylliew jingmut lang halor ka repot jong katei ka jingiakynduh bad u Myntri Rangbah bad ban wad ia ki lad ki lynti kumno ban ioh ia ki jingdawa.
U la ong ba la kyrpad ia baroh ki Rangbah Shnong/Nongsynshar Shnong, ki Nongkitkam Shnong lem bad ki dkhot ka Executive Committee jong ki Dorbar Shnong ka Ri Khasi bad Jaintia ban pyllait por khnang khnang ban poi sha kane ka jingialang.
“Ka Synjuk ka iawer kyrpang ruh ia ki Nongmihkhmat na ki Seng Kynthei/Seng Longkmie bad ki Seng Samla jong ki Dorbar Shnong ban ia poi lang sha kane ka jingialang kaba donkam”, la ong u Bah Blah.
U la ong ba namar ka jinglyngkot ka por, ka Synjuk ka pan map ba kan nym lah ban pynpoi ia ki notis sha man la ki Dorbar Shnong bad ka kyrmen ba baroh kin shim ia kane ka kyrwoh kum ka jingpynbna halor katei ka jingialang.