T.500klur ban iarap ia ki Scheduled Tribe, ong ka Sorkar India

New Delhi, 29 Rymphang:
Ka sorkar India mynta ka sngi, ka la rai ban pynduh noh, ha ka jingmang pisa jongka, ia ka plan bad ka non plan naduh ka snem 2017-18. Ia kane la iathuh da u myntri pla pisa jong ka sorkar India, U Arun Jaitley, haba buh ia ka mang pisa jong ka sorkar India, ha ka dorbar Lok Sabbha mynta ka sngi. Ha ka jingkren jong U Jaitley, ula ong ba ha ka jingpeit ha kine ki bun snem ba ladep, la iohi, ba ka mang pisa, na ka Plan ka dei kaba bha, katba ka jingiaid jong ka pisa na ka Non Plan, ka long kaba sniew bad halor katei ula ong ba ka sorkar India, kan ia trei lang bad ki sorkar Jylla, na ka bynta ban pynurlong ia kane ka mang pisa.
U myntri pla pisa, ula iathuh ba ka sorkar, ka la shim ia ki lad ki lynti ban iarap ia ki briew kiba duk bad kiba don ha ka jingim kaba eh bad u iathuh ba ka don ka skhim, ba la pyntreikam da ka sorkar India, ka Pradhan Mantri Fasal Bima Yojana (PMFBY), ka ban iarap ia ki nongrep na ki jingshah lynshop jongki ha ka mariang. Nangta u iathuh ba ka don ruh ka skhim ban iarap ia kiba pang, ka ban iarap ia shi bynta na ka lai bynta jong ki briew kiba pang ba shitom.
La iathuh shuh da u myntri, ba ka sorkar India, ka la mang T.500klur, na ka bynta ban pynkhlain ia ki Scheduled Tribe/Scheduled Caste bad nangta ia ki kynthei kiba trei kam lajong.
Katei ka tnat, kan iaid ha ryngkat jong ka tnat Ministry of Micro Small and Medium Enterprises (MSME), na ka bynta ban iarap ia ki Scheduled caste/scheduled tribes (SC/ST).
La iathuh ba katei ka skhim, kan ai lad ia ar tylli ki projek, na kawei ka bank bad ha katei ka skhim, kin don 2.5lak ngut ki trai kiba trei kam lajong, ki ban myntoi na katei ka skhim. U iathuh ruh ba ka don ka jing iakren ha kine ki sngi bad ka Dalit India Chamber of Commerce and Industry, na ka bynta ban pynkhlain ia ka jingtrei kam jong kitei ki rit paid.
Ha ka mang pisa jong U Jaitley, ka dor jong ki kali kan kham rem, ka dor jong u sikret kan kham rem, kaba leit bam sha ki restaurant kan kham rem, ka bill mobile kan kham rem bad kumjuh ruh ka bai leit jingleit da ka liengsuin lane da ka rel ruh kan kham rem.