Kam be-aiñ ia ki nongtrei sorkar ban bat Rangbah Shnong:Lamphrang Blah

Shillong, 29 Rymphang: Ha ka dorbar ka KHADC kaba la long mynta ka sngi u bah Teiñwell Dkhar MDC ka Shella u la wanrah ia ka motion ban ia kren halor ka jingeh ba ki Rangbah Shnong ki ia kynduh ha kine ki sngi hadien ba la pynkylla thymmai ia ka Meghalaya Conduct and Service Rule 1990, hynrei haba jubab ia ka jingkren ki nongiashim bynta halor katei ka mar u EM Incharge ia ka Elaka u bah Lamphrang Blah u la ong ba kam long kaba be-aiñ ia ki nongtrei sorkar ban bat kam Rangbah Shnong lane kino kino ki kynja seng. U la ong ruh ruh ba halor kane ka ishu ka KHADC ka lah ban thoh ruh sha ka sorkar.
Ha katei ka Dorbar u bah Donkupar Sumer, MDC ka UDP na Umsning u la wanrah ia ka mat ia tai halor ka jingeh ki paidbah kiba shong ba sah ha khappud bad ka jylla Assam kiba don ha ka thaiñ Ri-Bhoi, ha kaba u bah Sumer u la kren ia ka jingeh ki shnong kum ka Sabuda, ka Langpih bad ka Umwang kiba la jus ha pyndik ha ki pulit Assam. Utei u MDC u la ong ba ka donkam ia ka KHADC ban wanrah ia ki kam pynroi ha kitei ki thaiñ bad ban don ka jingiasngewthuh jingmut bad ka Karbi Anglong District Council. U bah Pynshngaiñ N Syiem haba jubab ia katei ka jingkylli u la ong ba ka FOCUSS kan shim ia ka jingkitkhlieh ban ia kren ia katei ka kam.
Kawei pat ka mat kaba la ia kren mynta ka sngi ha ka dorbar ka KHADC ka dei ka mat ba la wanrah da ka kong Teilinia S Thangkhiew kata ban pynkylla thymmai noh ia ka Assa and Meghalaya Autonomous District (Constitution of District Council) Rules 1951 bad katei ka dei ha kaba ia de ibad ka jingjied MDC shu sieh ha KHADC khnang ban lait na ki jingiatyngkhuh bad ki aiñ ka sorkar.Ia kate ka mat u CEM ka KHADc u bah Pynshngaiñ u la ong ba ka la don ka jingiakren ha kipor ba la leit bad ka la don ruh ka komiti ban peit ia katei ka kam bad mynta ka kynti u la ong ba ka long kaba dei ban pynkylla noh ia ka A.D Rules ban weng noh ia ki ktien ‘lah’ hynrei ban buh da ki ktien ‘dei ban’.
U CEM u la ong biang ba ha ka jingshisha ka GHADC ka don la ka jong ka aiñ kaba skhem halor ka jingjied MDC shu sieh bad katei ka aiñ ka dei ba la ai bor beit ha ka District Council ban sieh MDc shu sieh, hynrei wat nalor ba la khlaiñ katei ka aiñ ruh u la ong ba u MDC shu sieh jong ki haduh mynta um ioh jingmynjur. Utei u khliehduh ka District Council u la thalaiñ ia ka sorkar jylla kaba la leh politik ia kitei ki kam baroh.