Tuid um jakhlia na Civil Hospital Ialong

Shillong, 29 Rymphang: Ka WJNC hadien ba ka leit jurip ia ka Civil Hospital kaba don ha Shnong Ialong West Jaintia Hills District kala lap ia ka jingtuid ka um jakhlia ba wan na civil hospital bad katei ka la pynjynjar ia ka leit ka wan u paidbah bad ka la pynsniew dur ruh ia ka surok bah.
Katei ka seng ka la dawa na ki bor ba dei peit khamtam ka incharge ba dei peit ia ka civil hospital ba ka dei ban kit khlieh khamtam ia kane ka um ba jakhlia ba wan napoh katei ka hospital bad na ka liang katei ka seng ka la ai por shitaiew eiei ban pynkhuid ne ban pynduh noh ia katei ka um ba jakhlia ha katei ka jaka, lada kam leh eiei halor kane ka la byrngem ban shim da ki lynti pyrshah ia kate ka Hospital, kane ka long katku ka kyrwoh khubor na u bah P.S. Phawa WJNC President .