Ban lait ia knieh jingtep, buh ka Balang Katholik da ka kpep200tylli ki long iing, la buh shyieng ha ka kpep ha Nongthymmai

Shillong, 13 Jylliew:
Ban lait na ka jingiaknieh jaka tep namar ka jingduna ki jaka, ka Balang Katholik ka la pyndonkam noh da kawei ka rukom da kaba shna ia ka jaka buh shyieng ne kpep na ka bynta kito ki dkhot jong ka Balang kiba la khlad.
Ha kane ka rukom, kano kano ka met iap kaba la tep hynniew snem shaneng lah ban sei noh ia ki shyieng bad buh ia ki ha ki jaka bala pynbiang da ka Balang khnang ba ia ka jaka tep kan kham khyl luid.
Haba iakren bad uwei u phadar uba dei peit ia ka ingmane Nong thymmai u Fr. Edmund Gomes u la iathuh ba ka ingmane Nongthymmai ka la shna ar tylli ki kpep ba buh ia ki shyieng. Kawei ka kpep la shna ha u snem 2009 bad kawei pat la shna ha u snem 2012.Ia ka metiap ym dei ban buh palat 15 snem lada ki bahaing kim sei hapoh ka 15 snem ka balang kan sei hi noh ia ki shyieng. “Wat kito ki bahaing ba hasem ki bym tip shuh ia ki jaka tep jong ki, na ka liang jong ka Balng ka la ban ai jingtip ia ki bahaing ba hasem namar ka Balang ka buh ia ki jingthoh thik pa thik”, la ong u Fr. Gomes.
Ha kine ki kpep la shna haduh 400 tylli ki synduk bad ha kawei ka synduk la thep tang na ka bynta kawei ka longing longsem. Haduh mynta la dep buh 200 tylli ki longing, kiba la thep ia ki shyieng ha ki synduk kiba dei tang na ka Nongthymmai Parish.
Kumba long mynta ki jingdon jong ki paid riewngeit ka Balang Catholic ki don kumba 1700 ngut ki longing tang na ka Nongthymmai Parish.
U Fr Gomes u la iathuh ba um lah ban buh lang ia ki shyieng jong ki paidbah bad ia ki shyieng jong ki phadar. U la ong ba kane ka kpep la shna tang na ka bynta ki paidbah hynrei ia ki phadar la buh ha ka Parish jong Laitumkhrah.