T.16klur, na ka bynta 3 bnai, ka mang tyngka ka KHADC

Shillong, 26 Rymphang: Ka dorbar jong ka District Council kaba la long mynta ka sngi ka la wanrah ia ka mang tyngka kaba T.16,02,7,980 tyngka (Khad hynriew klur ar lak lai phew hynniew hajar khyndai spah phra phew tyngka). Katei ka mang tyngka ka dei na ka bynta ka lai bnai kata naduh ka 1 tarik u iaiong, 2016 haduh ka 30 tarik u jylliew 2016.
La wanrah ia katei ka mang tyngka da u CEM ka KHJADC u bah Pynshngaiñ N Syiem ha ing dorbar ka KHADC. Katei ka mang tyngka ka dei kaba la mang khamtam eh na ka bynta ban siew tulop ia ki dkhot ka Executive Committee bad ki nongtrei hapoh ka jong ka kumjuh ruh ia ka ophis u Chairman, ki Judicial Officer bad ki nongtrei hapoh jong ka Council Court.
Katkum katei ka mang tyngka ba la wanrah ka pyni ba ka District Council ka la mang T.373,15,560 na bynta ka General Administration Department, T.9,56,450 tyngka na bynta ka Law Department, T.1,12,18,360 na bynta ka Revenue Budget & Finance Department, T.1,44,71,610 na bynta ka Forest Administration Department, T.83,45,290 na bynta ka Legislative Department,T.T.2,08,670 na bynta ka Education Department , T.7,24,78,610 na bynta ka Civil Work & Development Department, T.83,01,180 tyngka na bynta ka Enforcement Scheme for Protection of Tribal Land & Forest. Ia katei ka mang tyngka la ia kren hapoh ka ing dorbar mynta ka sngi bad yn mynjur ia ka ha ka dorbar ka ban long ha ka 4 tarik u bnai ban wan.