Pyndam ka EJNC, ia ka jingspel dak bakla Khliehriat

Shillong, 25 Rymphang:
Hadien ba ki ar tylli ki Bank kata ka Canara Bank bad ka United Bank of India ha ka shnong Khliehriat ki la thoh bakla ia ka kyrteng katei ka shnong, ka seng East Jaintia National Council (EJNC)-Central Council, hapoh ka jing ialam jong u Bah Shanbok Syad (President),Samla S.Lyngdoh (General Secretary) ryngkat ka jing synran lang ki dkhot ka la leit ban pyndam noh ia katei ka jingthoh dak bakla bad ka la phah ia ki nongpyniaid bank ba kin shna da kawei pat ka Sign board kaba thymmai bad ki dei ban pyndep ia katei ka kam hapoh ka shibnai. Katei ka seng ka la ong ba nalor ki sign Board kitei ki Bank ki dei ban pynbeit lut baroh ia ki jingthoh dak bakla ha ki kot ki sla baroh namar ba ka jingbakla jong ki ka pynjah burom ia ka District.
Ka EJNC ka maham ruh ia baroh ki bank,ki Ophis Private ki dukan kiba don hapoh EJHD ba kim dei ban thoh dak bakla ia kino kino ki kyrteng shnong kiba don hapoh ka District haba ki thoh ha ki signboard ne  ha ki kot ki sla, ka la byrngem ba lada kan dang lap ia kum kine ki jingthoh kan pynshitom katkum ki kyndon jong katei ka seng.