Bein u Mukul, iaroh U CEM ka KHADC ia ka sorkar NDA

Shillong, 24 Rymphang: U Chief Executive Member ka KHADC u Bah Pynshngain N Syiem u la iaroh ia ka sorkar NDA ba ialam da ka BJP kaba la ai pisa kylluid ia ki lai tylli Autonomous District Council ha kane ka jylla. Kane ka jingiaroh u CEM ka KHADC ia ka sorkar pdeng, ka long mar khongphong ia ka jingkren jong u Myntri Rangbah ka jylla u Mukul Sangma uba la bein la khoh ia ka sorkar pdeng ha ka jingkren hynnin ka sngi bad ki nongthoh khubor.
Haba kren mynta ka sngi u Bah Pynshngain u la pynpaw ia ka jingsngew nguh ia ka sorkar NDA kaba la mang pisa, haduh T.1000 klur kum ka ‘special assistance grant’ ia ki 10 tylli ki Autonomous District Councils (ADCs) ha kane ka dong Mihngi ka India na ka bynta u snem 2015-2016.
U Bah Pynshngain u la pynkynmaw ia ka jingialang bad u myntri khynnah kam pohiing ka ri u Kiren Rijiju halor ka jingpynlait noh ia ka jingbei pisa na ka 14 Finance Commission ia ki district concil.
U la ong ba u la aiti ia ka shithi sha u myntri pla tyngka ka ri u Arun Jaitley bad la iakynduh ruh ia ki heh ka tnad kam pohiing kiba la pynpaw ba kim dei ban khuslai.
“Ngi la kren shai ha ka shithi ha u Arun Jaitley ba ngi la shah kyntait ban bei pisa na ka 14 Finance Commission,” la ong u Bah Pynshngain.
U la ong ba ka KHADC kan ioh pdiang T.133.12 klur, ka Garo Hills Autonomous District Council (GHADC) kan ioh T.100.71 klur bad ka Jaintia Hills Autonomous District Council (JHADC) kan ioh T.33.57 klur.
U la ong ba ka North Cachar Hills Autonomous Council kan ioh T. 24.66 klur, Chakma Autonomous District Council – T. 4.58 klur, Lai Autonomous District Council – T. 4.64 klur, Mara Autonomous District Council – T. 7.64 klur, Bodoland Territorial Council – T. 421.02 klur, Karbi Anglong Autonomous Council – T. 94.11 klur bad ka Tripura Tribal Areas Autonomous District Council – T. 175.95 klur.
“Nga sngew kmen ban iohi ba ka sorkar NDA kaba la ai pisa ngi”, la ong u Bah Pynshngain.
U la ong ba kane ka dei ka jingiarap ba shisien kaba dei ka jingpynbeit na ka tnad pla tyngka ka ri namar ba ka tnad kam pohiing ka don ha ka jingpynkhreh ban pynkylla ia ka Sixth Schedule bad ka la don ka jingtyrwa ban pynhap ia ki District Council ha ka Article 280 khnang ba kin ioh pisa na ka 14 Finance Commission.
“Ngi kyrmen ba ka tnad pla tyngka ka ri kan bei pisa haduh ban gin pynhap ha ka Article 280 namar ba mynta ngi don ha ka Article 208”, u la ong.
“Ka paw shai ba ka sorkar NDA ka sngew khia ia ki district council ha kane ka dong mihngi”, la ong u Bah Pynshngain.U la ong ba wat la ka pisa kan iaid lyngba ka sorkar jylla hynrei la kdew shai ba dei ban pynlait beit biang por sha ki district council.