“17 shnong kin jah duh syndon, lada den wah Khri ka Assam”

Shillong, 13 Jylliew:
Ka jingialang kaba long mynta ka sngi ha Mairang, kaba la lam khmat da ka Indienous Biodiversity & Social Welfare Organisation (IBSWO) , kaba la long mynta ka sngi ha kaba la don da ki nongmihkhmat na ka Hima Nongkhlaw, Hima Rambrai, Raid Mynsaw bad kumjuh na kiwei de ki seng sain pyrthei bad kiwei pat ki seng na Assam, Manipur, Nagaland ki la rai ban khanglad ia ka jingthmu jong ka Assam, ban den ia ka Wah Khri bad la dawa na ka sorkar Meghalaya, ba ka dei ban pyntip noh mar mar ia ka jingpyrshah jongka, halor kane ka phang sha ka sorkar Assam. Ka jingialang ka wah ruh ba ka Khasi District Council, ba kan ieng halor ka rai jongka, ban pyrshah ia kano kano ka jingtei ia ka nan ha Wah Khri bad la dawa ruh ba ka sorkar India, ka dei ban nym ailad ia katei ka jingthmu ban den ia ka Wah Khri da ka Assam.
Ki daw jong ka jing pyrshah ka long ba ki 17tylli ki shnong kiba hap ha ka Hima Nongkhlaw, Hima Rambrai bad Raid Mynsaw, kin sa ngam noh bad kin sa jah shi syndon, ka ban ktah ia ki briew kiba don ha kitei ki Shnong, ba kin sa kylla long ki riew poi wir, ki bym don iing don sem. La ong ruh ba katei ka jingden ia ka Um, kan ktah ia ka jingkylla ka mariang bad kumjuh kan lah ban don jingma, ha ka por jong ka jingkhie Jumai.
Na shibun kiba la don lang ha katei ka jingialang mynta ka sngi, ki kynthup ia U bah KP Pangniang, uba dei u dkhot jong ka iing dorbar Jylla, uba mih khmat na Rambrai Jyrngam.