Kmen ka MEPA, ba iarap nongthoh khubor ka Assam

Shillong, 23 Rymphang:
Ka Meghalaya Editors & Publishers Association (MEPA), ka ai khublei halor ka rai jong ka sorkar Assam, ha kaba ka ai jingiarap ia ki nongthoh khubor ha katei ka Jylla.
Ka sorkar U Tarun Gogoi, ka ai T.2lak, lyngba ka Journalists’ Family Benefit Fund, ia kito ki nongthoh khubor, kiba la don lai snem ha ka kam bad nangta ka sorkar Assam, ka ai ruh ka bai tymmen, kaba T.5,000 hajar shibnai, ia ki nongthoh khubor jong katei ka Jylla, kiba la palat 60snem shaneng.
Ka MEPA, ka khmih lynti ba ka sorkar Meghalaya, kan bud ia ka nuksa ba bha jong ka sorkar Assam bad ba kan leh eiei, ia ki nongthoh khubor ha ka Jylla.
La dawa da ka MEPA, ba ka sorkar kan pyllait noh ia ka ram jong ki kotkhubor, kaba la kot sha palat T.5klur, kaba la shu pynsah da ki bun bun snem kynthih, kumjuh ia ka tnat DIPR, ka bym shym la pyllait satia wat shi pisa, ha kane ka shisnem kynthih, kynthup ruh ia ka jingiarap ia ki nongthoh khubor, kaba la tip ka Journalists Welfare Fund (JWF).
Ka MEPA, ka la phah ruh mynta ka sngi, ia ka dorkhas sha U Chief Secretery ka sorkar Jylla, ha kaba ka pynpaw ia ka jingsngew diaw kaba jur, ba ka sorkar Jylla, kam shym la leh eiei, ban pyllait ia ki bai jingpynbna na ki tnat sorkar bapher, kaba la poi mynta sha palat T.5klur ia ki kotkhubor jong ki trai Jylla.
Tang ka tnat DIPR, ka pynshah pisa kaba palat sha ka T.50lak ha ki kotkhubor, ong ka kyrwoh jong ka MEPA.
Ka MEPA, ka kren diaw mynsiem shibun eh, ha kaba wat ia ki jingai khublei Kristmas bad snem thymmai jong u myntri rangbah ruh, ym shym la siew pisa tista satia sha ki kotkhubor bad ka seng ki nongthoh khubor, ka dawa namarkata, ba dei ban pyllait noh mar mar ia kitei ki pisa ba dei ban siew sha ki trai kotkhubor jong ka Jylla Meghalaya, ong ka kyrwoh na U bah Mr  RM Shabong, President, Meghalaya Editors & Publishers Association (MEPA).