Sahkut 77 ngut ki nong Meghalaya ha Haryana

Shillong, 22 Rymphang:
77 ngut ki nong Meghalaya kiba dei ki nongrep bad ki ophisar jong ka Meghalaya Basin Development Authority (MBDA) kiba la leit ban ia shim bynta ha ka 4th Dairy Conference ha Karnal, Haryana ki la sahkut ha Sonepat katba ki dang don ha lynti iaid jong ki, katei ka dei namarba ka lan don ka jingiakhih ki jaitbynriew Jat ha katei ka jylla.
La ai jaka rieh ia kitei ki 77 ngut ki nong Meghalaya da ka Fertilizer Employees Co-operative Society kaba lapynbiang bam bad jaka sah ia ki,la bthah ia ki ba kim dei ban mih na katei ka jaka ba ki don namarba ka don ka hukum jong ka sorkar ban siat iap tang shu iohi ia kitei ki briew kiba pynkhih ha katei ka jylla. Ar ngut ki ophisar jong ka ka MBDA kiba donlang mynta ha ka jaka rieh tngen bad ki nongrep ki long u Dr. B. Lyngdoh bad Dr. H. Paul, iathuh u Aiban Swer u ophisar uba don ha ka Special Duty, jong ka Meghalaya Institute of Governance haba kren bad ki lad khubor.
Ha ka juh ka por, u Nodal Officer jong ka NE Region, Delhi, u Robin Hibu, u la bthah ia katei ka kynhun ki briew na ka jylla Meghalaya ba kim dei ban khih na katei ka jaka tad haduh ban da jem ka jingiakhih namarba kumba ka long mynta ka jingiakhih ka dang jur bad ki la mih bun ki jingpynjulor ia ki mar sorkar, u la bthah ia kito ki ba sahkut ha katei ka jylla ba kin phone sha u ha u nombar 9810083846. U Hibu u la pyntip ba ki Gurdwaras kila ai bam bad jaka sah sha ki spah ngut ki briew kiba la sahkut ha katei ka jylla namar ba la pynsangeh noh ia ka leit ka wan ka rel.