Kubur ka UDP ba tlot ka liangpyrshah bym iatylli

Shillong, 18 Rymphang: Ka UDP ka la kubur ba ka la don ka jingtlot jong ka kynhun Liangpyrshah hapoh ka iing dorbar thawain ka jylla, namar ba kam don ka jingiatylli kawei. “Ka long kaba shisha ba ka Liangpyrshah ka tlot ha iing dorbar thawain, hynrei ka jingkynnoh tang ia ka UDP, kam iahap satia”, la ong u General secretary ka UDP u Bah AF Dkhar haba kren sha ki nongthoh khubor hadien ba la wai ka jingialang ka Central Executive Committee hynne ka sngi.
“Peit ha ka Meghalaya People Forum (MPF) ruh, don tang ka UDP bad ka NPP, katba kiwei kim treh ban iadon lang”, la ong u Bah Dkhar khlem da niew kyrteng ia kiwei, kum ka HSPDP, ki MLA shimet ki bym kwah ban iadon bynta bad ka MPF.
Kat kum ka jingong u Bah Dkhar, ka jingtlot ka Liangpyrshah ka dei tang namar ba kam don bun ki MLA hynrei ha ka jingiakren bad rah ia ki mat ba donkam, ka khlain bha.
Ha kajuh ka por, u la ong ba ka jingkhang ban iatylli jong ki seng riewlum ha ka jylla, ka iai plie haduh mynta kumba la ju kren kham mynshwa. “Ngi kren shai ba ka jingkhang ban wan iatylli jong baroh ki seng riewlum ha ka jylla ka dang iai plie haduh kine ki sngi, kumba ju iakren mynshwa”, la ong u Bah Dkhar.
U la ong ba ka jingiatylli jong ki seng riewlum, ka long kaba donkam eh ban wanrah ia ka jingkhlain ha ka jylla.