Mynta ka dorbar pyllun Hima Mylliem ban dawa weng ia u Syiem

Shillong, 17 Rymphang:
Ka dorbar pyllun jong ka Hima Mylliem, kan long lashai ka sngi  ban iakren ia ki kam ba la ujor pyrshah da kiba bun ki myntri ia u Syiem Mylliem u Paiem Latho Manik Syiem.
Kane ka dorbar kaba lah ban khluit bha, la khot hadien ba la pynmih da ka KHADC ia ka jingbthah ia ka bor Hima ban lum ia ka dorbar ba la ioh ia ka jingujor na ki myntri ka Hima. Yn pyniaid ia ka dorbar da u Syiem Khynnah kaban sdang ha ka por 1 baje mynsngi, la ong u Myntri K Nongkhlaw.
Katkum ka jingia kren bad u Myntri Nongkhlaw, ki myntri kiba don kumba 28 ngut na ka 42 ngut, kiba pyrshah ia ki kam  jong u Syiem Mylliem, kin dawa ba dei ban weng noh ia u Syiem kumba la buh ruh ia ka jingujor sha ka KHADC kham mynshwa.
“Ka jingdawa ban weng noh ia u Syiem, ka dei kaba la dep buh naduh kham mynshwa”, la ong u Myntri Nongkhlaw ka Hima Mylliem.Ha kane ka dorbar, ka KHADC kan phah ruh ia u nongpeit pyrman ban bishar ia ka jinglong jingman ka dorbar bad ba un ai kaiphod pat sha ka KHADC. Kham mynshwa, u Chief Executive Member ka KHADC u Bah Pynshngain N Syiem u la ong ba ka Council ka la bthah ia ka Hima Mylliem ban khot noh ia ka Dorbar Pyllun shwa ban kut u bnai Rymphang mynta u snem.   “Ngi la ai por ia ki ba kin khot noh ia ka Dorbar Hima, Dorbar Pyllun bad ngi kyrmen ba kin leh shwa ban kut une u bnai Rymphang”, la ong u CEM ka KHADC haba iakren dang shen.    Ka KHADC ka la hap ban bthah ia u Syiem ka Hima Mylliem hadien ba u la ioh ia ka jingujor na ki Myntri ka Hima ia ka jingbym ju khot dorbar shuh u Syiem la bun snem mynta. Kumba 28 na ka 42 ngut ki Myntri ka Hima Mylliem, ki la ujor sha ka KHADC pyrshah ia u Syiem, u Paiem Latho Manik Syiem, pyrshah ia ki kam leh donbor jongu, bad ki katto katne ki myntri khlem da iatip lang ka Hima, kum ka jingdie jaka ha Lum Mawpat sha ki kynhun Balang, ka jingshna dukan ha Iewduh bad kiwei ki kam Hima.
Na ka liang u CEM u la ong ba ka dei ka kamram jong ka Hima Mylliem ban khot ia ka Dorbar bad ban shim ia ka sur jong baroh ki dkhot.
“Ngin ap ia ka jingmih na ka dorbar”, la ong u CEM.