Sawa ka kyrteng U bah Shylla, ha ka elekshon Nongkrem

Shillong, 15 Rymphang: Ka elekshon MDC shiteng samoi ka dang jngai bad ym pat shym la pynbna haduh mynta ruh ia ka sngi ban long elekshon, hynrei ka lyer elekshon ha Nong krem konstitwensi ka la sdang ban beh bha ha kaba ka sur u paidbah mynta ha katei ka konstitwensi ka sdang ban sawa jur sha u bah H.S Shylla uba dei u MLA bad MDC barim bad u Chief Executive Member (CEM) barim ka KHADC.
Ha ka jingiakren bad u Rupang uwei na ki nongkyrshan radbah jong u bah Shylla u la pynpaw ia ka jinglyngngoh kaba khraw ha kane ka sien kaba mynta naba u la ong ba ki briew kiba la leit khroh ia u bah Shylla ba un ia khun elekshon ki dei kito ki briew kiba ju ieng pyrshah bha ia u ha ki elekshon kiba la dep. U la ong ba ki briew kiba leit ban khroh biang ia u bah Shylla ban wan phai sha ka Politik ki dei ki nongialam jong ka seng Congress bad kiwei pat ki seng bad ki dei ruh ki briew kiba kyrshan bha ia u bah Ardent M Basaiawmoit (MLA ka Nongkrem konstitwensi) ha ki elekshon kiba la dep.
Utei u nongkyrshan radbah u bah Shylla uba la ju ia donlang ha kti hakjat jong u ha ki snem kiba la leit noh u la ong ba ma u bad kiwei pat ki nongkyrshan ia u bah Shylla ha kaba nyngkong ki la rai ba kin ym kynshoit shuh ia u bah Shylla ban ia khun elekshon (kata ka dei hadien ka jingrem elekshon jong u),hynrei mynta u la ong ba kiba leit khroh ia u bah Shylla ki dei pynban da ki briew kiba ju pyrshah bha ia u bad katei ka la pynshit rhem biang ia ka mynsiem jong ki.