Ioh kem ki nong ot doh masi ia u nongtuh masi

Jowai, 16 Rymphang:
Ka seng ki nong ot doh masi ha Jowai hapoh ka jingialam u President ka seng u ma Lewis Pyrtuh mynta ka sngi ki la iohkem ia uwei u briew uba la tip kyrteng kum u Shiningstar Kyndait na East Jaintia Hills District hadien ba la lap ba u la wan tyrwa die ia ki masi ha ka dor shiteng na ka dor iew.
Kane ka jingwan tyrwa die ia kitei ki masi ha ka dor kaba tad dor bha ka la pynsuba sniew ia ki dkhot bad nongialam ka seng ki nong ot doh ha kaba ki la bat bad ialam ia u sha thanad Jowai.
Haba tohkit bniah ia u da ki pulit ka Jowai PS, utei u Shiningstar Kyndait u la phla ba u la dep tuh haduh 12 tylli ki masi na ka shnong Iong kaluh ban tyrwa die tad dor ia ki sha ki nong ot doh masi ha shnong Demthring.
U la iathuh ruh ba dang don sa uwei pat u paralok jong u uba la donkti ha katei ka kam. Utei u paralok jong u uba la tip kyrteng kum u Tiplang Dkhar u la shah kem noh mynta hi ka sngi ha ki pulit ka nongbah Jowai na jan Thomas JOne College.
Ki trai masi ki la iathuh ba ki la dep ujor pyrshah halor kane ka jingshah tuh masi ha Ladrymbai OP bad na ka liang ki pulit Jowai, ki la aiti noh ia kitei ki nongtuh sha ki pulit Jowai ban leh ia kaba donkam.