Shah kem ar ngut ba dawa pisa ha kyrteng ka HNLC

Jowai, 14 Rymphang: Hynnin ka miet ki pulit special team na Jowai ha ryngkat ki pulit Amlarem ki la ioh ban kem ia ki ar ngut ki briew kiba donkti ban dawa pisa haduh 5 lak tyngka na uwei u rangbah ha Amlarem. Kitei ki ar ngut ki la ngat ha shrip jong ki pulit ha ka por ba ki dang wan ban shim ia katei ka pisa kaba ki la dawa ha ka kyrteng jong ka HNLC.
La iathuh ba hadien ba ki pulit ki la ioh jingtip halor ka iohpdiang uwei u rangbah ia ka shithi dawa pisa ba la thoh ha ka letter head jong ka HNLC ki pulit ka nongbah Jowai bad Amlarem ki la ap shrip ia ki bad katba ki dang wan ban shimti ia katei ka pisa ba la dawa, ki la ngat noh ha kti ki pulit.
Katkum u Superintendent of Police, kitei ki ar ngut ki dei kiba la tip kyrteng kum u Ngia Bareh (36) uba dei ruh u dkhot pyndem wait ka HNLC bad uwei pat udei u Pyn biang Lyngdoh (20) uba la kam ba udei tang u nong bud jong utei u Bareh.