Ngat ki runar tuh kali na Ri Bhoi, ha ka shrip ki pulit Assam

Nongpoh, 14 Rymphang:
Ki Pulit ka Byrnihat Police Outpost ha ryngkat ka jingiatrei bad ki pulit ka jylla Assam, ki la ioh ban pynpulom ia ka jingthmu jong ki runar ban rahbor ia ka trok kaba don ia u no.WB 23 B 6049, kaba hadien ba ki la shah kem noh ha ki pulit ka Assam ha Jagiroad.
Kane ka jingjia ka la jia ha ka 11 tarik u Rymphang ha 13 Mer haka por 3 baje mynstep, ki runar hadien ba ki la bom la shoh ia u draibar bad handyman, kumta ki la kit bak ia kane ka trok sha Jagiroad, hadien jong kane ka jingjia, u nongniah bad nongbud jong kane ka trok ki la wan ban pyntip mar mar sha ki pulit jong ka Byrnihat PO.
Ki pulit ka Byrnihat PO, hadien jong kane ka khubor ba ki la ioh, khlem da pynslem ki la ai jingtip mar mar sha ki pulit ka jylla Assam bad kumta hi ki pulit ka Assam da ka jingshimkhia ban thwet ia kine ki runar, ki la ioh ban kem ha ka janmet jong katei hi ka sngi na Jagiroad.
Ka tyllong khubor na ki pulit ka Byrnihat PO, la ong ba ia kane ka trok la niah da u Basumastry lem bad u nongbud Vicky Chetri, kaba kit mar ba kynthup ia ki borti bad sabon, da ka jingthmu ban leit pynhap sha Aizawl.
Ha kaba iadei bad kane ka jingjia, ki pulit hadien ka jingiohkem ia ki runar, ba kynthup ia u Rakes Prasad bad Biswajit, ki la dep ban rejister case pyrshah ia kine ki arngut kiba donkti ha ki kam runar, bad na ka liang jong ki pulit kin dang pynlong ia ka jingtohkit kaba kham bniah, ioh lehse ki donkti ha kiwei pat ki kam runar.