Nga kloi ban shimti President ka UDP lada ki ia ibit: Titos

Shillong, 11 Rymphang:
U MLA ka Sohra na ka UDP, u Bah Titosstar Well Chyne, u la pynpaw ia ka jingkloi ban bah ia ka lyngkot nong ialam ka party lada ki ibit ban bynshet ha u.
“Nga long uba kloi ban shimti ia ka kam President ka party, lada ki ia ibit ia nga ban bynshet ia kane ka kam. Nga la don ha ka party naduh ba la sdang ia ka bad, ngam don jingeh ban shimti lada ki tyrwa”, la ong u Bah Titos haba iakren mynta ka sngi.
U MLA ka Sohra, u la ong ba ha ka party UDP, kam ju don ka jing iaknieh ia ka kam nong ialam, hynrei ka dei beit lyngba ka jingiasngewthuh jingmut bad ka jingiabeit lang.
“Ngim ju don elekshon ha ka UDP, ngi don tang ka Nonimation Committee ban tyrwa ia ki kyrteng jong ki briew ban shimti ia ka kam nong ialam”, la ong u Bah Titos.
“Ngim ju don ka jingiakhroh ne kanbas, ne ialeh politik, bad lada don kiba leh kumta, lehse kan dei ka sien ba nyngkong ha ka party”, la bynrap u MLA Sohra.
Ka UDP kan sa pynlong ia ka jingialang bah ha ka 27 tarik mynta u bnai, ban jied ia u President thymmai bad kiwei ki nongkitkam ka party, kaba ialam da u President ba mynta u Dr Donkupar Roy naduh u snem 2003.
Kiwei ki paw kyrteng kiba lah ban don ha ka thup ban iakhun ia ka shuki President ka UDP, ki long u Bah Bindo M Lanong, bad u Bah Paul Lyngdoh kiba long mynta kum ki Working President.
U Dr Jemino Mawthoh uwei na kiba iakren ki briew sharum shaneng ba lah ban shimti ia kane ka kam, u la kyntait, katkum ka khubor ba u la pynpaw.
Ha kawei ka liang, halor ka kam bat Rangbah Shnong ki nongtrei sorkar, u Bah Titos, u la ong ba kane ka dei ka kamram jong ka district council, ym da ka sorkar.
“Ka kam Rangbah Shnong ka dei ka kam shakri lem, bym don jingsiew”, la ong u MLA Sohra bad bynrap, lada ki ioh jingsiew, ka la dei ia ka sorkar ba kan ong da kumwei pat.