Iateh ka sorkar jylla bad ka kompeni ban shna Water Policy

Shillong, 11 Jylliew:
Ka sorkar jylla ka la iateh bad ka German International Cooperation (GIZ) ban shna ia ka water policy jong ka jylla.
“Ngi la iateh bad ka GIZ kum ka technical ban shna kane ka policy ba donkam kaba iadei ban pynneh ia ki kynja baim ha ki wah bad ki um” la ong uwei heh sorkar.
Katkum ka jingong jong une u heh sorkar, kane ka kompeni na German ka la ju iarap ia bun ki ri jong ka pyrthei ban shna ia kum kane ka policy.
“Ki la wanrah ia ki stad kiba tip bniah halor kane ka kam bad ki la air uh ia ka jingai jingmut kaba bit dor ban shna ia kum kane ka policy. Kane ka policy ka treikam bha” la ong une u heh sorkar.
Haba iathuh ia ka jinglong jingman kane ka policy, une u heh sorkar u la ong ba ia mynta ki dang lum dang lang ia ki jingai jingmut na ki paidbah kynthup ki jingai jingmut jong ki tnad sorkar bapher bapher.
“Ngi la buh mynshwa ia kane ka policy ha ki paidbah da kaba pan jingmut kumno ban shna ia ka. Ngi kmen ban iohi ba ki riew shimet ki la wan shakhmat ban ai jingmut”, la ong u heh sorkar.
Hadien ba la lum la lang ia ki jingai jingmut, ia ka policy ba la pynbit nadong shading yn buh pat hakhmat u Myntri Rangbah ka jylla bad u Symbud Myntri Rangbah.
“Ia kane ka policy, yn leit pat ha ka jingialang jong ka kynhun myntri ban shim ia ka rai shwa ban pyntreikam ia ka”, la ong u heh sorkar.
Ha kajuh ka por, ia kane ka policy ba dang pynkhreh, la maitphang ban shna ia kaba iadei ban pynneh ia ki um na khyndew.
“La don ka jingbishar bniah ban shim ia ki um na khyndew da ki buit stad saian, ka jingbha ka um, bad ka jingbit jingbiang ban pyndonkam.
La iathuh ba ka jingpynsniew ia ka mariang halor ka jingpynjot ia ki um donkam ban iada ia ka, bad kane ka policy ba pynkhreh ka thmu ban tem ia kum kane ka jingsniew kaba pynjot ia ki wah ki um ruh ha kylla ki jaka jong ka jylla.
Kane ka policy ka la thmu ruh ban ai um kaba khuid sha ki nongshong shnong jong ka jylla kynthup ha sor bad ha nongkynong.
Kane ka policy ka la ban ruh ban don ka lad ban iada na ka jingshlei um bad kumno ban khang lad.