Jur ka jingrungtuh ki trok dewiong lyngba ki surok shnong

Nongpoh, 8 Rymphang:
Ka jingrung tuh jong ki trok ba kit Dewiong ka dang iaibteng wat hadien ba na liang ki Bor District ka Ri-Bhoi District, dang shen ka la dep ban pynjari da ki kyndon ain ba pyrkhing, da kaba maham jur ia ki trok kit ia u Dewiong ban rung ha ki surok shnong bapher bapher hapoh ka District.
Hadien ba ka seng ka la ioh ia ki jingujor na ki paidbah halor ka jingbun jong ki trok kit Dewiong kiba rungtuh lyngba ki surok shnong, kumta ka la pynlong ia ka jingialang ba kyrkieh, ha ophis treikam ka seng ha Umsning ha ka 6 tarik u Rymphang bad na katei ka jingialang ka seng ka la shim ia ka rai ban khang pyrshah ia kum kitei ki trok ba rung tuh na ki surok shnong, tang ban lait shah kem ne ngat ha ki kyndon jong ka ain.
Ha katei ka jingialang la ioh ruh ia ka jingiatai kaba jur ha kaba iadei bad ka jingwan rungtuh jong ki trok kit dewiong, kane ka jingrung jong ki kali heh ha ki surok rit ka la pynthut shibun eh ia ki paidbah nongshong shnong, khamtam kan wan rah ruh ia ka jingsniew bad jingjot jingpra jong ki surok bad kaba ktah ia ka khuid ka suba ha ki Shnong ki thaw
Katkum ba la pynpaw da u Bah Shaining Thangkhiew, Publicity ka RBYF Umsning Circle, la iathuh ba kine ki trok ki ju mlien ban rung sha ki surok shnong tang ban lait na kti ka ain, ha kaba kine ki trok ki ju pyndonkam ia ki surok shnong ba kynthup ia ka surok na Lad-Zero sha Kyrdemkulai, na Umsning sha Mawhati bad Umtasor sha Quinine.
“Bun na ki trok dewiong kiba shalan tuh ia u Dewiong kim iaid satia na u surok bah National Highway – 6, ha kaba ki malik dewiong ne draibar ju mlien ban pyndonkam ia ki surok shnong, ha ka por ba ki phetrieh ne haba ki pynhap ia u Dewiong” ong u Bah Shaining.
Ka seng nangne shakhmat kan iai peitngor bad lada ka dang lap, ia kiba dang bteng ban rung sha ki surok shnong, ka seng kan shim da kaba lad ban aiti beit sha ki bor jong ka ain, khnang ban khanglad ia kum kitei ki trok ba pynkhein ia ki kyndon jong ka ain, bynrap u Bah Shaining.
Ka seng ka dawa ia ki bor ka ain ba kin peitngor ha kitei ki surok, khnang ba ka jingrungtuh jong ki trok dewiong kan nym pynthud ia ki paidbah nongshong shnong, kumjuh ruh ka la dawa na ki malik dewiong bad kumjuh ia ki draibar ba kin lum noh ia ki dewiong na manla ba ki la dep pynhap, da kaba maham ruh ba nangne shakhmat ba kim bit shuh ba kin pynhap ia u Dewiong ha kino kino ki jaka, khamtam ha ki shnong ki thaw.