Kem ki pulit kiba pynbthei bom ha Williamnagar

Shillong, 8 Rymphang: Ka khubor pulit ka la iathuh ba u nongpynbthei bom ha Williamnagar u la wan ban pyndem dalade hi ha khmat ki pulit ha ka lah sngi u Blei bad na katei ka jingwan pyndem jong u bad ka jingphla jong u ki pulit ki la ioh kem sa ar ngut kiwei pat ki paralok ba ia jan bad u kiba ia donlang bad ka GNLA. Utei u GNLA uba la wan pyndem u dei uba la tip kyrteng kum u Lalit N Marak katba ki paralok jong u pat kiba la shah kem ki dei kiba la tip kyrteng kum u Jackstar M Sangma uba ju khot sin u Jaksrampa bad uwei pat dei u Bishnu, la kem ia ki ha ka jingkhynra kaba ki pulit ha Nokrek Bolmoram, East Garo Hills. Kitei lai ngut ki la phla ba ki dei kiba la donkti ban pynbthei bom ha u kyllalyngkot ha Williamnagar, ki la phla ruh ba ki la buh bom IED ha ka surok ban iaid na Williamnagar sha Songsak, u Lalit u la iathuh ba ia u bom la buh ha kawei ka dukan kyiad kaba don ha Williamnagar.