Donkam ban tip ki samla ia ka shongkha shongman:Saksena

Shillong, 8 Rymphang:
“Da ka jingmana kiba iadei ka shongkha shongman, bad kiwei ki kam, bad ka jingkiew ki kam leh sang ia ki kynthei, ka long kaba donkam eh ia ki samla ym tang ban ioh ia ka jinghikai hynrei ia ka jinghikai ha kaba iadei bad ka sap ban saindur ha ka jingim jongki”, la ong u nongseng ka Enfold Proactive Health Trust, Bangalore, ka Dr. (Ms). Sangeeta Saksena ha ka workshop halor ka jingai jinghikai ia ki nonghikai halor ka kam shongkha shongman ia ki samla kaba long mynta ka sngi Nyngkong ha Martin Luther Christian University(MLCU).
Ka Dr. Saksena ka la ong ba ka jinghikai ka long kaba donkam ha kine ki sngi bad ka jingim ka kynthup ia ki bynta ba kongsan jong met, ka jingialap pynshai, ka jingpynthikna ha ka jingim.
Ka la ong ba katkum ka surbe ha u snem 2007, haduh 53% ka don ka jingshah leh sang ia ki khynnah bad 21%  kiba kham jubor ka jingleh tohmet ia ki kynthei bad kane kam runar ka la nang kiew.
Katba u Deputy Commissioner ka East Khasi Hills district, u Bah Peter S Dkhar haba kren kum u kongsan, u la ong ba  kum kane ka workshop kan iarap bad ai jingmyntoi ia ki samla pule, ia ki nonghikai bad ia ki samla ha ka nongbah ban pynsngewthuh ia ka shongkha shongman bad kumno ban iada na ki jingpang kum ka  HIV/AIDS bad STD.
U la ong ba ka workshop, kan iarap ban weng ia ki jingeh bad ia ki briew ba iakynduh ia kane ka kam sniew.Ki don 26  ngut ki nonghikai ka MLCU  kiba wan ha kane ka  workshop nalor ki samla pule.