Pynshai u nongialam UDP

Shillong, 7 Rymphang:
U Bah Allan F Dkhar, General Secretary ka UDP ula pynshai mynta ka sngi, halor ka khubor, kaba mih ha U Rupang, ha ka Sngi Saitjain ba ladep, kaba ong “U Dr Don, Bah Bindo ne bah Paul, kin iaknieh shuki President UDP” bad utei u rangbah, u la pynshai ba um shym la donlang ha ka Jingialang.
Ka jubab na U Editor: Katei ka khubor, ka long katba kum ka jingioh jingtip jong u nongthoh khubor, hynrei lada utei u rangbah, ula pynshai ba um don lang ha katei ka jingialang, kumta ka la kut noh kumta bad ngi pynshai ha ki nongpule, ba kin shim noh ia katei ka jingpynshai jong U bah Allan, ba um don satia ha katei ka jingialang.
Ka jingpynshai jong U bah Allan, kaba la phah sha U Rupang, ka ong “Kane ka dei ka khubor lamler ka bym don jingshisha haei haei ruh bad kiba thew sha ka jingiasngewthuh bakla hapdeng bun mamla”.
“Kumta, da ka mynsiem ba sngewkhia, nga kyrpad rit iaphi ban sngewbha pan jingpynshisha na u reporter jongphi bad nga ngeit phin leh ia kaba donkam namar kane ka lah wanrah shibun ki jingkynad bad nga kyrmen ba phin sngewbha pynshisha ne pynshai, khnang ba ngan lait ban iaid da kiwei pat ki lynti. Nga kyrpad ba phin sngewbha pynshai ha sla banyngkong, khnang ba kan shai kdar” pynkut ka jingpynshai na utei u rangbah.