Jyllei bha ka jingbret khun, ha ki dong ka Sor Shillong

Shillong, 10 Jylliew: 
Ka jaid bynriew khasi kaba ju niewkor bha ia ki kynthei, hynrei sngew phylla ban shem ba ha kine ki sngi bun na ki kynthei ba bret khun kim duna na ki khynthei khasi.
Katkum ka jingtip ba la ioh na ka Reach Shillong Ministries, la iathuh ba ka jingbret khun ka long namar ba bun na ki kynthei ki ia leh shongshit khlem pat dei por ha ka shong kha shong man. Bad kane ka jingleh shongshit ka jong ki ka ialam ia ki sha ki jingtieng ia ki bahaing ba ha sem, ha kaba ki la hap ban shim noh da ka lynti bym dei.
Wat la ym ioh ia ka jingkhein ka ba thikna, hynrei ka jingbret khun ka la jyllei bha. Dang shen la don kum kane ka jingjia ha kaba kawei ka longkmie ka la bret ia la I jong I khun hapoh ka thain Upper Shillong.
Hynne ka sngi u rupang u la ioh ban iakren bad ki nongpyniaid jong ka Reach Shillong Ministries ha ka la iathuh ba ia kum kine ki jingjia ka ministry ka ju shim ban ri ia ki.
“Shuwa ban shimti ia ki ka Ministry ka pyndep shuwa iaki kyndon kumba la buh da ka sorkar”la ong da u nongpyniaid ba dei peit ia kane ka Ministry.
La iathuh ba ia ki khunlung lah ban aiti la da don ki briew ki ba kwah ban shimti (adopt)  ia ki bad shuwa ba kin shimti ia ki khunlung ki dei ban pyndep ia ka ain ba la buh da ka sorkar.
Bun na ki jaka ki ba la ju lap ia kum kane ka jingjia dei kum ha Nongmensong, Mawprem, Madanriting bad Mawblei kine baroh ki hap hapoh ki jaka sor.
Kane ka Ministry kadei kawei ka ba ri ia ki khunlung  ki ba 12 snem shapoh kiba la shah ieh bein ha ki kmie ki kpa. Bun na ki khun ki shah iehbein ki dei na kito ki longing ki ba iapait iapra ha ing ha sem ha kaba u kpa u long kum u khra pei bad kam don shuh ka jingiasngewthuh jingmut bad ka kmie ha ing ha sem.
La iathuh ba ia ki khynnah ki ba dang ithuh ne dang lap ia ki bahaing ba hasem kane ka Ministry ka ju iakren bad ki ban pynsngew thuh ba kin shimti biang katba ia kito ki bym lap bahaing ba hasem shuh ka ju shimti hi ma ki ban ri ban ai ka jinghikai ia ki haduh ba kin da dap 18 snem.
Ha kajuh kapor kane ka Ministry ka ju ai jingiarap marbam ia kito ki longing kiba shem jing jynjar, tangba ka rukom ai la jied tang ia ki katto katne kiba da kordit shisha.