Dawa dorbar kyrpang ka MPF, ban iakren kam Rangbah Shnong

Shillong, 02 Rymphang:  Ka kynhun pyrshah ha ka iing dorbar thawain ka  Meghalaya, ka Meghalaya People’s Front (MPF) ka la pynher shithi sha u Lamphang ka iing dorbar thawain, u AT Mondal, ban khot noh ia ka dorbar kyrpang khnang ban iakren ia ka kam Rangbah Shnong kaba la pynkhih pyrthei hadien ba la pynmih ka High Court ka Meghalaya ia ka rai jongka.
Ha ka shithi sha u Lamphang,  u secretary ka MPF u James K Sangma u la ong ba ka jingialang jong ki nongialam ka UDP, NPP, GNC bad ka KHNAM kaba la long ha ka 28 tarik Kyllalyngkot 2016  ka la iakren ia ka hukum ka High Court ka Meghalaya  kaba mih ha ka 13tarik Kyllalyngkot, 2016 ha kaba iadei bad ka bor jong ki rangbah shnong ha Meghalaya.
“Kane ka kam, ka la pynkhihwin ia ka jingmut jingpyrkhat jong ki paidbah ka jylla Meghalaya.  Ka la dei namarkata, la sngew dei ba ka iing dorbar thawain ka dei ka rynsan kaba biang eh ban iakren ia kane ka kam bad ka MPF ka kyntu ia ka ophis jong phi ban khot ia ka dorbar kyrpang ban iakren ia kane ka kam”, la ong u James K Sangma.