7tarik kiew lum Sohpet Bneng

Shillong, 2 Rymphang:
Ka jingkiew pyneh rngiew ba shisien shisnem jong u khun khasi khara sha kliar u Lum Sohpet bneng ba la pynbeit  da ka Lum Sohpetbneng Komiti jong ka Seng Khasi (Kmie), kan long ha ka 7 tarik u Rymphang, 2016. Ha kane ka sngi, ki tym men ki san jong ka Seng Khasi Kmie kin sdang ia ka jingleh niam ha khyrdop Lum Sohpet bneng, Umiam-khwan, G.S.Road ha ka por 7:30 mynstep bad ha ka duwan dupat ba kyntang, ha kliar jong u Lum ha ka por 11 baje mynstep bad yn sa bud pat ia ka jingsam ia u khaw eh khaw shan bad ka um ksiar um rupa sha baroh ki nongwan. Kin don ruh ki jingkren pynshai na ki riew rangbah ka Seng Khasi ha ryngkat ka rwai ka shad tynrai. Ka Lum Sohpetbneng Komiti ka ia wer ia baroh ki khun ki ksiew jong u Hynñiewtrep Hynñiawwasa sha kane ka kiew pyneh rngiew pynksan rngiew ba shisien shisnem jong ka jaitbynriew.
Na ka daw jong ki jingduna ki jaka pynieng kali, ka Komiti ka kyrpad ia baroh ba kin ia treilang bad ki jingbthah jong ka komiti bad la kyrpad ia baroh ba kin pyrshang ban kiew pyneh rngiew da kaba iaid da ka kjat sha kliar jong une u Lum ba kyntang. Yn shah ban hiar kali na Lum hadien ka 2:00 baje nohphai sngi, ong ka kyrwoh khubor na u Fornick Kharrubon Secretary Lum Sohpetbneng Komiti.