Ai snam man ka por ban iarap ia ki briew, ong u Lat

Shillong, 02 Rymphang:
Ka jingduna ki nongai snam ka long kawei na ka jingeh ba ju iakynduh man ka por, bad ka la dei ia ki dkhot ka Indian Red Cross Society ban pynlong man ka por ia ka jingai snam, la ong u Lat ka jylla u V. Shanmu gananthan haba kren ha ka jingialang jong kut snem ka Indian Red Cross Society, Meghalaya Branch ha Raj Bhavan mynta ka sngi.
U Shanmuganathan uba dei ruh u President ka Indian Red Cross Society u la kyntu ia ki volunteer ba kin pynlong ia ka jingai snam man ka por ha ki skul, kolej bad ha kiwei ki jaka ban long ka jingiarap ia ki briew ba donkam ia ka.
U Lat uba iakren bad ki dkhot ka Society u la buh jingkylli na ki ia ki kam ba ki dei la leh bad kiei kiba ki dei ban leh.
Kane ka jingiakren bad u Lat, ka la pynlong ia ki dkhot ban pynsngew ha u ia ka jingangnud jongki ban leh ha ki sngi ban wan.
Ka General Secretary ka Society, ka Kong Diana E. Kharshiing ka la kyntu ia ki dkhot ban wan jngoh khah khah ia ka jaka treikam ka Society khnang ban lah ban treikam khambha.
Katba u myntri ka koit ka khiah u Bah AL Hek, uba dei u Vice president ka Society, u la ong “bun ki paidbah ki phun sha u ba ki ju donkam snam namar ba ki don kiba haiing hasem jongki kiba pang bad ka long kaba donkam ia ka Society ban don ka jaka buh snam khnang ban ai ha ka por ba ki briew ki donkam”.
Ka jingialang kut snem ka Society ka long ha ka sien ba nyngkong ha Raj Bhavan.
Katba u Chairman ka Society, u Bah WR Marbaniang uba dei u IPS barim, u la kyntu ia ki dkhot ban long kiba la khreh ban iakynduh ia ki jingtynjuh.