Weng pakhang ophis KSU South West

Shillong, 10 Jylliew:
Ka KSU jong ka South West khasi Hills district ki la rai ban weng noh ia ka jing pakhang ophis ha ka 11 bad 12 tarik jong mynta u bnai hadien ba ka la ioh ka jingkular na u myntri ka tnad PWD u bah Sniawbhalang Dkhar, uba la pyntikna ba ia ka surok un pynbha bad maramot noh da kaba pyndap maw shuwa ia ki surok.
Ia mynta u Myntri u la ong ba un maramot shuwa da kaba siang tang da ki maw namar ba ka suinbneng kam pat I long ban pyntrei namar ba dang jur u slap bad ha u bnai Nailur ban wan kin sa siang rong jlih.
Ha ka jingshisha ka KSU ka la dep pynbna ban pynlong ia ka jingphakhang ophis ha ki thain Mawkyrwat, Ranikor Bad ha Mawsynram ban pyrshah ia ka jingsniew palat ka surok ha kitei ki thain.
U President ka KSU SWK u Bah Kitboklang Syiemlieh u la ong ba katei ka surok ka la shah ieh khunswet mynta la 5 snem ha kaba ki paidbah kila ia kynduh jingeh shibun bad dei tad haduh kane ka kynti ba ki la lah ban seisoh ia ki jingthmu ka jong ki.
Bah la iathuh ba ka sorkar ka la kular ban shimkhia ban pynbha noh ia ka surok jong ka shnong Borsora haduh Nongjri ha kaba kane ka surok ka la ktah jur ia ki paidbah jong kitei ki thain.
La iathuh ruh na ka liang jong u DC ruh u la kular ba un peit halor ka jingiadei bad ka jingkiew dor jong ki mar babam mardih ha katei ka thain.