Kyllon iap u Area Commander ka GNLA

Nongstoin, 31 K’Lyngkot:
Katkum ka jingioh jingtip jong ki bor pulit ka Shallang halor ka jingdon jong u Pangkam u Area Comander ka GNLA ha ryngkat ki katto katne ngut ki nongbud jong u ha ka shnong Nengju kaba don ha ki thain Shallang, na ka liang jong ki pulit SWAT na Shallang ha ryngkat ka jingiatreilang bad ki pulit ka Williamnagar kila pynlong ka jingkhynra kab jur bha ha katei ka thain.
Ka khubor na ki pulit ka iathuh ruh ba ha ka sngi saitjain jong ka taiew bala lah katba kitei ki kynhun pulit ki dang pynlong ia ka jingkhynra kaba jur bha ha katei ka jaka, kala don ka jingiather kuli kaba jur bha hapdeng kitei ki kaikhlaw bad ki kynhun pulit kaba la jia ha kapor 8 baje mynstep bad ha katei ka jingiather kuli ki pulit kila ioh ban pynliem noh ia u tei u Area Commander jong ka GNLA.
Shuh shuh la ong ruh ba ha pdeng katei ka jingiather kuli ki nongbud jong u Pangkam kila ioh lad ban phet krad noh na katei ka jaka shapoh ka khlaw bad don ruh napdeng jong kitei ki kaikhlaw bala lait phet kila ngat ruh ha ki kuli jong ki pulit bad kiba la mynsaw jur.
Hadien katei ka jingiather kuli ki pulit kila ioh ruh ban kurup ia kawei ka pistol, ka id card, ki kot ki sla, ka seal, saw tylli ki mobile phun bad shibun tylli ki sim card ha ryngkat ka met jong u tei u Area Commander ka GNLA kaba la thiah lyngktar ha katei ka jaka ba ia siat.
Na ka liang jong ki pulit ki dang bteng ban thwet bad ban iai pynlong ia ka jingkhynra kaba jur khnang ban lap dien ia kitei kiba la laitphet na katei ka jaka.