Shisngi shuwa ka Republic pahara jur ki pulit ka jylla

Shillong, 25’lyngkot:
Ki pulit ka jylla Meghalaya ki la pynlong ka jingpahara kaba jur ha kylleng ka jylla, kum shi bynta ban peit ba ka jingrakhe ia ka sngi Republic ha kane ka jylla kan long kaba iaid beit iaid ryntih khlem kano kano ka jingshah pynwit ha ki kynhun lehnoh ne ki runar. Ha shi lynter ka surok sha Ri-Bhoi ka la don ka jingpahara kaba jur kaba ki pulit ki la talasi ia ki kali kiba ki ishan khmat.
Hynrei wat la ki kot khubor ha kane ka jylla kim shym la thoh eiei shaphang ka pakhang shnong ki seng lehnoh kumba ju long manla u snem pynban la iohi ba ki kot khubor ha Assam bad kumjuh ruh ha ka ri India kum ka Zee News ki la thoh ba ki seng lehnoh ki la khot ia ka pakhang shnong ha ka sngi rakhe Republic.
Katkum ka jingthoh ba la sot na kitei ki khubor Assam Tribune bad Zee News, ki la thoh ba ka United Liberation Front of WESEA (UNLFW), Coordination Committee (CorCom) ka Manipur, Garo National Liberation Army (GNLA) bad ka Hynniewtrep National Liberation Council (HNLC) ki la khot pakhang shnong naduh ka por 12:01 baje mynstep haduh ka por 6:00 baje janmiet ha ka sngi hat majai jong ka taiew. Katkum katei ka jingthoh la iohi ba ki seng lehnoh ki la khot pakhang shnong haduh 18 kynta ha ka sngi rakhe Republic Day ha baroh kawei ka ri India.
Kumba long mynta kam shym la don kano kano ka jingthoh ha ki kot khubor ha kane ka jylla ba kan don kaba kum katei ka pakhang shnong hynrei katkum ka jingioh lum jingtip u nongthohkhubor la sngewthuh ba watla kam shym la mih ka jingthoh ha ki kot khubor pynban u paidbah u la ioh jingtip ba kiwei pat ki lad khubor ba kan don ka pakhang shnong bad la sngewthuh ba ki iew ki hat bad ka iaid ka ieng u paidbah kan kynjah hi mynta ka kynti ruh kumba long ha ki snem kiba la dep.