Kwah U MR, ka lynti Um hapdeng ka India bad Bangladesh

Shillong, 25’lyngkot:
U Myntri Rang bah ka jylla u Dr.Mukul Sangma ha ka sngi u blei jong ka taiew u la pynpaw ia ka jingthrang jong u ban pynsuk ia ka leit ka wan hapdeng ki briew jong kane ka jylla bad ka Bangladesh da kaba thaw lad sa da ki lynti ban iaid na Um bad ia kane u la ong ba u kwah ban leh kumta khnang ban kyntiew ia kane ka thaiñ ha ka kam khaii pateng hapdeng ki ar Ri. “Ka jingiadei hapdeng ki ar ri ka la nang ia jan ia jan bad ka donkam ban pyntreikam mynta sa da ki lynti na Um khnang ba ka jingiadei kan lah ban kyntiew ha ka kam khaii pateng” ong u Dr.Mukul haba kren ha ka Bangladesh Investment & Policy Summit 2016 kaba la long ha Dhaka.
U myntri rangbah u la ong ruh ba ka National High Way kaba dang thaw thymmai kaba pyniasoh ia ka North Bengal bad ka ri Lum Garo ka dei kaba la kyrmen ba kan shakri ia kipaidbah ka thaiñ ha ki kam khaii pateng bad ki ri kum ka Bhutan,Nepal, North East India bad Bangladesh. U la kren ruh ia ka jingdonkam ban don ka kad liengsuiñ ha Sylhet khnang ba kan kyntiew ia ka kam jngohkai pyrthei ha kane ka jylla. U la kyntu ruh ia ki nongkhaii ka Bangladesh ba kin snohkti lang ruh ha ka kam pynmih bording.