Kat nang pyrshah, nang kiewdor ka jingdie duma, khaini

Shillong,10 Jylliew:
Ki la mih bun ki jingiakren bad ki jingpyrshah bad ruh ki jingpynma kiba har rukom ia ki jingdih duma da kaba pyntieng da kumne kumtai ba ka lah ban thaw ia bun jait ki jingpang. Ki la don ruh ki jingiaiaid paidbah bad kiwei pat ki prokram ban pynshai paidbah ba kane ka long jingma kaba lah wat ban bthat ia ka jingim jong ki briew, hynrei wala katta ruh ki paidbah kim don jingsalia eiei ia kata ha kaba la iohi shai ba ka jingdonkam jong ki ia ki duma ka la long palat ban ia kiwei pat ki jingdonkam.
La iohi ia kane ha ki dong jong ka dong sor Shillong kaba don marjan bad ka Secretariat ha kaba ki nongdie madan hangtei kiba ju wai dong bad sikret ki ju die ruh ia u duma kum u khaini, Shikhar, Tiranga bad kiwei pat ki duma pawdar.
Kaei kaba la jia ha katei ka thain jong ka Shillong ka long ba ia ka dor jong u shikhar kaba la thoh T.2 tyngka ki nongdie hangtei ki la die beit T.5 tyngka bad haba la pyrshang ban kylli na ki ia ka daw ba ki la die tam kitei ki nongdie ki la ong ba ka dor thied jong ki naduh ki dukan heh ruh ka long hi kumtei. “Kumno ngin die T.2 tyngka haba ngi thied T.4.50 piah ong iwei ikong iba die wai dong hangtei”.
Lada long kumne imat ym don patiaw ia ka dor ka mur jong ki duma katba bun pat ki ia ud ia ka jingkiew dor jong ki marbam naduh ki khaw bad kiwei. Wat la hapdeng ka jingpynkiew kaba palat ia ki dor ba la thoh ha kitei ki jingbam bang jong ki briew kaba phylla pat ka long ba ki nongthied kim patiaw eiei, ha kaba ki shu pan bad sei beit ia ka pla pisa ban siew khlem da ujor bad kylli ia ka dor ba la die tam na ka dor ba la buh. Kane ka long ka dak ba ka ba sniew ka khamlah dor ban ia kaba bha.